新宿串燒店多如繁星，但要數最強一定係新宿南口嘅鳥茂，晚晚爆場嘅佢店內人聲鼎沸，食物主打係牛&豬，叫set大約八千至九千円左右，有十多串豬串燒&燒牛，而當中一個魚籽海膽和牛丼攞命咁好食，三種味道喺舌頭上互相衝擊，卻出奇地夾，既邪惡又精彩；名物燒豬肝亦令人難忘，表面燒到焦脆，內裡鮮紅粉嫩半生熟狀態，入口有嚼勁，半點腥臭味都冇，日本人處理內臟係有一套，一口肝一口酒簡直大滿足；另一味豬內臟刺身(有生腸豬肚豬肝)，只要你敢食，天下美味。
鳥茂約廿個店員全部忙到七彩(喺日本好少見咁多伙計)，據店員所講，試過有客人打咗廿幾次電話都冇人接聽，所以訂位有一定難度，而我比較好彩，酒店代辦一take過搞掂，想食的話，最佳方法係親身走去book。
鳥茂
東京都涉谷区代々木2-6-5 (JR新宿駅南口徒步約2分鐘) 定休日： 星期日 03-3379-5188