在粵一樓遇上兩個殺手
近年香港飲食界有個幾得意現象，以前好多收得好埋、淨係做熟客生意嘅高級私人會所名廚，都紛紛下山出來開檔。好似最近在食友之間瘋傳、低調進駐灣仔英皇駿景酒店一樓嘅粵一樓，聽聞班底就係來自大名鼎鼎嘅高級會所五陵會，大廚入廚超過40年，功架極之扎實，瞬間成為預約困難店。多得好友盧覓雪幫忙訂枱呢餐飯先至成事，令我呢個冇資格入高級會所嘅窮L都可以一嘗最奢華嘅家常味。而英皇駿景主理人似乎頗著重飲食環節，粵一樓、國際咖喱館一間接一間進駐應該花唔少唇舌，令我再去呢度食飯嘅藉口又多一個。
入到粵一樓，裝修雖然帶點低調奢華嘅飯店氣派，但望望張菜單，賣嘅竟然有唔少望落好平實、好家常嘅傳統功夫菜。唔好以為家常嘢好容易做，對火候同食材嘅極致掌握往往會考起大廚。
先鋒係乾蔥煎排骨，一上桌已經香氣撲鼻。大廚將排骨表面煎到微脆，裡面卻仲保持到嫩滑多汁，最精彩係下得極重手嘅乾蔥，爆得焦香而且完全釋放出那股帶甜嘅辛香，乾蔥嘅香甜完全「入晒肉」，鹹香得嚟又帶點甘甜，惹味到極。呢種乾蔥油香用嚟佐酒一流，邊吹水邊食，轉眼就清碟。
再嚟係陳皮蒸牛肉餅。好多出面所謂名店嘅蒸牛肉餅，唔係腍到毫無口感就係加咗過多鬆肉粉。呢度嘅牛肉餅一食就知係手工貨，牛肉剁得極有誠意，保留適度嘅咬口與嚼勁；當中靈魂係陣陣幽香嘅老陳皮，陳皮切得幼細，油脂香與陳皮嘅甘醇喺嘴裡爆發，層次即時提升，猶勝灣仔粵菜老牌子褔記七記，完全係白飯殺手，令人忍唔住大叫添飯。
最後仲有椰香葡國雞。葡國雞呢味懷舊中西合璧菜，而家想喺外面食到有水準嘅，愈嚟愈難。呢度嘅汁底調得非常順滑濃郁，椰味好香濃但又唔會蓋過薑黃粉同香料嘅底蘊，濃郁而不膩，時甜時辣極有層次。而雞件煮得入味，連裡面的薯仔都吸飽醬汁精華，入口即化。拎匙羹舀濃汁淋喺飯面，就算明知碳水化合物超標，都完全忍唔住又要啪多碗飯！一晚遇上兩個白飯殺手，後生時唔明Juno點解會《愛上殺手》，今晚明咗。
呢度嘅菜式冇花巧嘅擺盤又唔做作，完全係憑扎實嘅炒功、蒸功和調味征服我嘅味蕾。香港太多臥虎藏龍識食之人喇，粵一樓難訂位真係一啲唔出奇。
粵一樓
灣仔皇后大道東373號英皇駿景酒店1樓
23116288
