近期上架嘅《風色幻想SP手機版》，雖然土下座從來唔係fans，不過無可否認呢個系列名氣算係非常大，由1999年推出第一集開始，喺台灣淨計正傳，都一直出到8集咁多，仲有其他外傳同埋衍生作品，因此呢隻《風色幻想SP手機版》都頗多人期待同支持。至於遊戲玩法跟以往一樣係SLG戰棋，但加入手遊元素如抽卡、升星等系統設計，多多少少都會嚇怕部分老玩家。好在遊戲「佛心」地免費送十抽必中SSR，抽唔啱仲可以再抽過，等大家可以抽中想要嘅角色先正式開始。故事方面就比較服務fans，將以往系列嘅劇情用新方法講解，人設聲優等都頗有誠意，質素絕對見得人。不過年度大作《天地劫》本月底就會上架，同樣都係戰略遊戲，勢估唔到十幾年後兩隻台灣IP會再次出現競爭，除咗印證手機市場龐大、人人都想分一杯羹之外，亦證明以往台灣中文單機遊戲其實絕對唔失禮，相信日後仲會見到更多台灣IP轉成手遊，例如《炎龍騎士團》、《俠客英雄傳》、《超時空英雄傳說》……