樓價近兩周不但回穩，甚至止跌回升。(資料圖片)
幾個月前，有位做「財仔」的老友和我說，「債仔」好似「夾埋唔還錢，已經軟硬兼施，但沒有效用，都唔知點樣辦」。老實說，做得財仔就不能夠手軟，如果太過仁慈，最後受到損失是自己。
老友問我應該如何做，其實好簡單，沒收幾個借錢有水位的物業，變成銀主盤之後「拿拿臨」在市場發售，平價都賣，只要不用蝕錢便可以。不過一定要預足時間予債仔籌錢還債，而且要依足法律程序，否則很容易被債仔「咬返轉頭」，指老友以低價賣樓而要求賠償。老友話明白，而且進行得很順利，由於很多財仔用這個方法追債仔還錢，令到樓價下跌，但大家又估不估到這方法可以穩定樓價？
做財仔老友和我說，近日「追數」比較容易，不知為甚麼，以前很難叫他們還利息的債仔，近日都主動還利息，做財仔都是求財，既然債仔主動還息，當然不會將債仔物業變成銀主盤後出售。少了財仔賣樓，樓價近兩個星期不但回穩，甚至止跌回升，今次真是「跌也財仔，止跌回升也是財仔」。