英國脫歐公投可算玩死人，原先有傳脫歐派領先，港股係咁跌，點知上周開始急轉直下，因為議員考克斯被殺而話留歐派超前，大市急不及待係咁升，點知喺好多人以為留歐應無懸念下，出乎意料上周五公投當天脫歐陣營贏成百一萬票，結果全球股市暴瀉，英鎊匯率急插一成。
翌日見有個倫敦樓盤大賣廣告，話倫敦仍然係世界第一金融中心，投資者趁英鎊大跌而喺倫敦置，係千載難逢機會。Loser睇完真佩服啲地產經紀，無論市升市跌都搵到賣點。
海航投資英國樓 兩個月唔見過億
平情而論，喺現時情況真係唔好中國大媽上身怕執輸入市，英國脫歐後，英鎊匯率會點走向Loser都唔敢亂估，但好多財經界人士、經濟學家同大企業都認為，未來英鎊走勢易跌難升，今日匯率好似跌唔少，但隨時未跌完；唔好睇少匯率變化，今年4月香港有間上市公司海航投資（0521）花咗1.3億英鎊（約14.4億港元），買入倫敦金絲雀碼頭瑞信大廈，到今天三個月唔到，匯兌虧損唔見咗億幾港紙，幢商廈1年租金回報4.8厘，即係話成年回報已經報銷。
英鎊未來點走，好視乎英國金融中心地位會否受動搖，坦白講，脫歐後英國喺資金及人流出入上，隨時會面對好多規限，金融中心最重要一環係資金、人才係咪可以自由流通，脫歐後大家未知點，估計肯定不如前。再講，今次支持脫歐主要係基層或支持佢哋嘅政客，未來影響力抬頭，政策上未必一面倒利好金融業。其實，呢幾日股市同匯率表現，好明顯係大家都唔睇好倫敦未來金融發展。
想買倫敦樓 最好忍忍手
金融業係支持樓價一個最重要因素，從事金融嘅人最俾得起租，特別喺倫敦核心區，各國金融精英雲集，人人要搵地方住，搶高晒啲樓價。未來金融發展受阻，又或國際機構減少喺倫敦設點，樓價邊會有運行。
有人話，金融業唔掂啫，製造業或農業唔使受到好多歐盟規條限制，加上匯率若下跌將更有利出口，咪可以補番條數，甚至仲好？loser可以話俾大家知，諗都唔好咁諗，金融佔英國GDP比重十分高，其它行業根本係無得比，即使出口多咗，有排都替代唔到金融。況且脫歐後，你要向歐盟輸入貨品，未必可以好似過往咁順風順水，人哋都會向英國佬哋設下規限，結果或許衰過舊時。
所以話啫，千萬唔好貪平搶買倫敦樓，等多幾個月局勢發展先決定，即使過去倫敦好輝煌，但世事冇絕對，大家若然讀過歷史，都知英國曾經叫做「日不落帝國」，今日英國國際地位又點，大家有眼睇？再看看東京樓價，跌咗廿幾年都未跌完，今日樓價仲平過天水圍呀！