土炮射手鬥入波

英超隊歐洲賽幾近全軍覆沒，全因內耗嚴重；如今各路大軍安心返英超繼續困獸鬥，射手榜季尾纏鬥一樣精彩。博冧莊嘅藍月「夏神」跌watt，幾位土炮高爾彭馬、奧尼屈堅斯同蘇蘭基今屆著火；仲有3屆得主嘅埃及人沙拿同最強黑馬嘅瑞典人伊沙克都有機會，今屆英超早已突破場均入3球嘅新紀錄，中上下游球隊鬥入波，射手空群上位，睇怕入球紀錄繼續推向頂峰。

一個聯賽嘅發展係唔係健康同強大，百花齊放係其一指標，仲有係咪重視本土新人嘅發展，今屆英超冬窗轉會淡靜，各隊多不假外求，寧願畀機會新人上位；以射手榜前10人為指標，英超暫有6個係三獅精兵，土炮射手上位冠絕4大聯賽，只有沙拿同老孫兩位前度得主係非歐洲人。相反另一方嘅意甲，講到下屆有機會最多10隊踢歐洲賽，但暫時前10位射手冇一個係意大利人，南美同非洲人共佔4人，發展唔健康；最有前途係拿玻里嘅尼日利亞人域陀奧森漢，跳糟英超機會唔細，不過只怕係另一位車仔箭頭、塞內加爾嘅尼高拉斯積遜。