英超「霸」氣伸延
兩季前3大歐洲盃賽玩瑞士制大聯賽，英超各大球會投資額度更大，搜刮各地精兵維持多線發展，交易億鎊計已不出奇，上屆更歷史性3盃決賽全部佔一席。英超5強早前一出歐聯即全勝響頭炮，而黑馬球隊喺國內希望繼續推倒英超Big Six圍牆，成功外闖踢歐洲盃賽嘅話，呢個路徑更易名成利就。
歐霸大聯賽首輪今周做主打，英超三路興兵，其中「南北雙雄」般尼茅夫同新特蘭都係史上首次參加歐洲分組賽或大聯賽，而水晶宮靠上屆攞咗歐協聯升呢打歐霸，呢個機會連佢哋倫敦鄰居，大把水嘅車路士同熱刺今季都冇機會做到。贏歐霸再上歐聯，收入再翻幾倍，不過水晶宮今夏再放走後防主力兼換帥，大賺轉會費嘅代價，可能係打護級戰；反而「南北雙雄」喺歐霸嘅前程，就有機會實際反映到英超係咪可以進一步壟斷歐洲盃賽。般茅首周聯賽幾乎令曼城失分，新特蘭啱啱場英超搞到阿仙奴非常狼孭，攞住呢類賽績同現有人腳，就算今季遇到歐霸奪標熱門、祖記同A米兩大意甲勁旅，可能易踢過英超好多。