澳洲贏波啟示
英超上季由以守為攻、悶波連場嘅阿仙奴封王，引來大批haters批評；事實喺頂級比賽，高手過招唔係鬥攻好睇、星味夠濃就應分贏波。今屆加大版世盃，隨時造就小組第3名做爭霸黑馬，神奇球隊去到淘汰賽打大佬，從來都係睇世盃一大樂趣，澳洲一戰功成，將會引來一眾小國仿效博贏波3分出線。
澳洲以4-5-1陣式以弱勝強，打敗土耳其暫時最驚喜，據聞教練普波域係阿仙奴領隊阿迪達嘅仿效對象。袋鼠兵正選11人只有一個踢緊5大聯賽，前面兩位非洲裔前鋒都係英冠兵，膽正命平唔會留力；相反土耳其集合國內聯賽精英加埋幾位歐洲大聯賽球星，卻俾泊大巴嘅澳洲兩次突擊打低。歐洲隊佔成個決賽周三分之一隊數，濫竽充數，當中唔少非一線球隊嘅主力，經歷大半季嘅勞碌，未必易喺大賽再谷得起，易成小國攻擊對象爆冷溫床。預期未踢嘅分組賽，喺強隊冇必要全勝去盡入淘汰賽，將會潛在更多主守泊大巴嘅袋鼠足球；其中守穩突擊強嘅阿爾及利亞明早鬥阿根廷，睇下會唔會係另一驚喜。