施蒙尼長壽哲學

馬體會好特別，阿根廷人施蒙尼係歐洲五大聯賽現役最長壽嘅主帥，呢十多年喺佢嘅帶領下，馬體會成為西甲兩大班霸巴塞同皇馬嘅長期第三者。期間只係攞過兩次西甲冠軍、兩次打入歐聯決賽；但施蒙尼嘅年薪，早已係全球教練最高，只係先後俾教沙特職嘅恩沙基、同埋啱啱續約阿仙奴嘅阿迪達趕過。但睇唔到馬體會可以再次升呢下，施蒙尼份工仍然難以撼動。

襟撈總有一啲職場必殺技，馬體會財力唔夠皇馬、巴塞，隊內現時最大粒嗰位球星有離心，無時無刻想走人。但施蒙尼咁多年嘅教波哲學《Cholismo》，被形容為一種包含戰鬥、紀律、團結同犧牲嘅「黑馬策略」；最緊要球迷buy又忠誠，唔崇尚追星，更會噓爆嗰啲見高就拜、自以為是嘅大牌。連加拿大前鋒約拿芬大衛、南韓翼鋒李康仁等新兵，都踢得掂馬體會，就係體系成就人才嘅明證。隊波一向勁起上嚟，皇馬巴塞都忌佢三分，今晚喺歐聯主場招呼迷失中嘅曼聯，只係用煞食嘅瘋狂逼搶，足夠令紅魔主帥卡域克頭痕。