歐洲賽催命符
現今賽程密不透風下，歐洲大聯賽球隊底子唔夠厚，踢歐洲賽分分鐘變催命符。好似西甲基羅納，前季踢到歐聯鬥大巴黎同阿仙奴，但同屆聯賽僅護級成功，上屆終於捱唔住西甲排尾二降班。咪以為英超錢多，打得密冇有怕，今屆英超差唔多半數球隊踢到歐洲賽，已隱見幾隊波危機四伏，小心兩頭唔到岸。
參戰歐霸更似糖衣陷阱，好嘅梗係冠軍可直上歐聯大聯賽，但強如曼聯同熱刺前季齊齊打入決賽，都要半放棄英超，排下游好尷尬。咁大嘅誘惑但當中硬仗唔會少，所得到嘅收益只係踢歐聯球隊嘅兩三成，最大代價係周四踢完歐霸，再應付周末聯賽，冇好似曼城同阿仙奴分拆兩隊精兵，好易沉船。今屆3支踢歐霸嘅英超隊，卡士喺近年最弱，般茅、水晶宮同新特蘭踢咗7輪英超夾埋只贏4場，計佢哋踢嘅英超場均失約2球。最擔心應該係「黑貓」新特蘭，歐霸開局連勝變自負，早前作客同曼城鬥攻輸3比5，兩大箭頭同最強中堅傷晒，中場大佬沙卡官非纏身，小心今季要長期打護級戰。