英超水貨之選
英超大球會搵錢多豪得起，當打三獅國腳奇貨可居，又證明過頂得住英超超高強度比賽壓力，所以就算「1億始祖」基亞利殊幾年前由維拉過曼城後，表現冇再突破，但都叫攞過3屆英超同一屆歐聯冠軍。去年夏天利物浦最狂，重金買伊沙克唔好彩成日受傷另計，但喺德甲用1.16億英鎊買中場域斯，最新估值跌價三成，英超球會今夏瘋狂內購有因。
英超球會大多無視財政條例，押重注買人先使未來錢，今屆冇份踢歐洲賽嘅熱刺同車路士更擺明豪賭一鋪。熱刺重金買踢慣英超3兵，個價水分高啲都叫實際操作；車仔近年持續買入所謂世界各地新星嘅策略，從未取得重大成功仲繼續推進。新近更要用5千萬英鎊，簽入26歲嘅法國中堅麥辛斯拿確斯更狂野。冇咗上季季中走去曼城嘅中堅拍檔馬克古希，水晶宮由佢守住嘅防線全面漏水；有佢嘅法國隊踢今夏世盃3場失咗9球，高大但技術粗糙，水貨味濃，亦再次證明CV靚到好似車仔新帥沙比阿朗素咁，喺呢隊波係負責操兵，冇買人話事權。