這班女仔，很爭氣

COLLAR完成出道以來首個演唱會，我睇咗第一場，用兩個字總結最恰當：爭氣。

COLLAR條路有幾唔順？遠嘅，MIRROR演唱會意外對佢哋嘅打擊唔使我多講。近嘅呢？淨係演唱會前，先傳Day嘅負面新聞，再打擊Candy話佢買粉絲(我唔排除係粉絲買，之前都聽過其他女團嘅粉絲會咁做，仲好似買好多，但個女仔自己買follower你估佢哋好多錢咩)接二連三嘅攻擊，都幾明顯係有組織，見佢哋演唱會聲勢幾好，唔想俾佢哋好過。

講返個演唱會，先至聲明我唔係前夫，亦唔特別鍾意COLLAR，但我睇到係堅持令我感動。COLLAR年齡分布咁廣，一開始就唔諗住做AKB、Lolly Talk呢啲傳統可愛女團，而係要顯示女人不同魅力。我以前都質疑喺香港得唔得，睇完今次演唱會後我覺得可能得。因為即使面對咁多逆境、攻擊，7個女仔非常專心咁做好表演，每一個都有下過苦功︰

Ivy So明顯努力練過歌，回帶佢《造星》決賽時嗰種走音，而家技巧有進步，一定係練習嘅結果，即使未係唱得好好，但係有感情。

Winka好努力跳舞同埋身材保養，睇佢條腰就知。香港嘅審美觀佢唔會係索/靚，但有紀律都係一種美麗。

Day瘦咗勁多，唱歌比兩年前穩。而佢依然俾人一種快樂嘅感覺，無論佢係天真定係堅強，呢種態度，都係專業。

芯駖，跳唱平均分都極高，皮膚好到屈機，幾乎完美演繹中女天花板，要知道呢啲都係靠勤力。

Gao唱功穩咗，亦有隊長風範，佢無敵風火輪跳舞可以話係香港頂級嘅舞蹈表演。

Candy同Marf呢，我就覺得進步最小嘅，可能我嗰場第一場佢哋未鬆啦。

總的來說，7個女仔明顯冇被外界攻擊影響，專注努力，每一個人都喺唔同領域進步咗好多。仲有，演唱會大部分時間都係成隊人一齊喺台上，連唱solo時，其他成員都係一齊表演，原本屬於Marf嘅歌都成隊一齊唱，不分彼此，係隊形、團魂嘅表現。7個女仔眼神堅定，跳舞又齊，我喺台下，真心佩服佢哋，原來「港女」可以咁堅強、咁犀利、咁爭氣。