金像獎個頒獎禮再精彩，始終不及賽後的討論精彩。就算不談劉嘉玲。
我想起一篇伊索寓言。一對父子騎驢，無論阿爸騎驢阿仔行路，還是阿仔騎驢阿爸行路，還是兩個一齊騎驢，還是兩個也不騎齊齊行路，總會引來花生友的不滿或批評或嘲笑。
最佳電影。《毒舌大狀》贏了，有人認為只不過勝在票房夠高，電影根本平平無奇，頂盡一套法庭電視劇的其中一個單元，贏最佳電影但其他所有提名也敗北，證明是分豬肉。如果頒給《命案》呢？我肯定也會有人覺得電影充滿銀河映像昔日作品的色彩，但又及不上，而且，睇唔明。如果頒給奪得最多技術獎的《金手指》？唔係啩，贏在製作成本高咋，有錢大晒呀？如果頒給《白日之下》或者《年少日記》？港台劇集都可以做最佳電影？
到最佳男主角。梁朝偉贏了，學劉嘉玲的預言，當然有人忍不住說出一句：「又係你呀，悶唔悶啲？」《金手指》的演出不是梁朝偉的最佳喎。唔投票俾梁朝偉，評審驚被批評唔識貨呀！諸如此類。如果頒給黃子華呢？黃子華做返自己咋喎，咁都算演技？如果頒給盧鎮業呢？未夠班。如果頒給林保怡呢？戲份少到似個男配角咁喎。頒給大鵬？乜水嚟㗎，聽都未聽過，套戲叫《第八個嫌疑人》，無睇過喎。
到最佳女主角。未選，單看五強名單，已經有人批評無個出得大場面。不過，你可以想像，如果又見到幾個見慣見熟的前輩名字，又自然有人嗌悶，認為應該俾多少少機會新血。現在，余香凝贏了，當然有人跑出來說一句死好彩。老老實實，其實任何一個贏出來，也會被認為是死好彩。
頒給資歷淺的，不滿意；頒給老前輩，也不代表必定被認可。看最佳男配角，入行七十年的姜大衛贏了，即時有人認為來自「序有應得」威力，與演員演出無關。否則，怎可能不是吳慷仁？到真的由吳慷仁勝出？自然又會變成連位得高望重前輩也不給個肯定，是一點敬老也沒有。
不要誤會，我不是指責。相反，我欣賞。還會對獎項名單提出反對聲音，至少證明仍然著緊，間接反映仍然關心香港電影圈。總好過不聞不問。若干年前，我也會在賽前預測，如果賽果跟心水不相符，也會忿忿不平覺得有冇搞錯。可能，人大了，開始學懂別把自己看得太大，明白自己的意見只不過是自己的意見，對於整個投票團隊來說，微不足道到不值一提。賽果跟自己的想法有出入，其實又有甚麼出奇？
先不說投票者投票時可能只注重提名人跟自己的交情，或者能否為自己帶來利益。就假設個個投票者也公正廉明，看齊所有候選電影才按照自己分析投下神聖一票，但人人有自由意志的話，人人有不同喜好，本來就理所當然。總不可能自大到認為賽果跟自己選擇不相同便等於不合理。雖然，也是人之常情。那篇寓言，結局，好像是班七嘴八舌的街坊，終於逼到兩父子要身水身汗抬起隻驢步行，才對身邊所有聲音也麻木了。我們阻止不到自己是那一班街坊，但願金像獎的主辦單位不像那一對父子。