最近和一位曾經會經常聯絡嘅朋友，不再聯絡了。細個嘅我會將之稱為絕交。
關於絕交這回事，細個會覺得一定係對方唔啱，所以大家嘅友誼先會落得如此下場。大個之後發現原來對方冇唔啱，自己亦未必有做錯。反而係雙方都太啱、太有理了，有理到大家無路可退。發覺其實只係大家理念不再相同，冇必要要求任何一方去委曲求全。
關於絕交這回事，細個會公告天下，然後要人評評理。成人後面對同樣事情，我反而會絕口不提，因為自己的事自己最清楚。假若身邊嘅朋友剛好談及此人，我鐵定不會道他人長短。反而是微笑帶過，然後神不知鬼不覺地跳到另一話題。
關於絕交這回事，細個心中會充滿激盪，會有同佢不計前嫌、破鏡重圓嘅慾望。現在年紀長了，城府開始深了，若然真的有機會重修舊好，心入面永遠都會有條刺。
關於絕交這回事，細個會有「寧願從來冇識得呢個人」嘅諗法。但而家自己會慶幸當初有機會認識彼此，曾經存在嘅友誼還是珍貴的。我甚至覺得感恩，喺佢身上我看到了我之前從未看到嘅自己。無論後來發展成點，她還是有恩於我的。
關於絕交這回事，細個會用紅筆寫信畀對方，會覺得就此一絕，以後老死不相往來。自己變成大人了，會將之視為暫時不聯絡而已。Social Media還是會繼續Follow，在街上碰面還是會打招呼，見到共同朋友Post出有她嘅照片，想Like仍然會Like。我哋嘅關係唔係停止(Stop)，而係暫停(Pause)，但呢個暫停會維持幾耐就不得而知了。有可能是三個月，可能是兩年，也很有可能是一輩子。
一名乾物女，過氣空姐，為愛由北區移居到北歐多年。熱愛地球同時喜歡講粗口，志願是能夠與動物溝通。
fb：為何斯德哥爾摩沒有譚仔三哥 by 三家姐
ig：sis3ter