近日花姐喺一個分享會上評論「我最喜愛」獎項，引起熱烈討論。根據網上瘋傳片段，花姐當時係咁講︰「我成日都同我啲artist講，你唔好同我講你係偶像派啦，我唔想呀。我甚至同佢講我唔要再攞『我最喜愛乜乜』，好戇居，攞『我最喜愛乜乜』咪即係你冇實力，淨係靠人哋投票囉，我唔想係咁呀，大佬！」網民評論主要分正反兩方︰
反︰MIRROR及個別鏡仔都有拎過「我最喜愛」，邊有經理人咁踩自己旗下啲藝人㗎？王菲、張學友等神級歌手都曾經是「我最喜愛」，唔通佢地又冇實力咩？而且受人喜愛都係實力嘅一種。
正︰花姐講嘅係事實。原來佢都明白班仔唔可以一世做偶像，原來都會要求佢哋以實力服眾，原來都明白專業上得到認同，先可以突破粉絲框框，街客都鍾意佢哋。
根據我觀察，反方大部分係鏡粉，以「姜糖」及「神徒」尤其激動；而正方則以街客為主，甚至可能係haters，普遍覺得花姐呢番說話幾啱聽。事實上，個分享會由一間院校主辦，觀眾來自四方八面而非粉絲，咁或者可以解釋到上述嘅現象。即係花姐呢番說話唔係要取悅粉絲，而係講出佢對旗下藝人嘅期望。
其實花姐呢番說話同佢呢幾年嘅說法好一致，就係希望旗下藝人嘅實力得到認可，係「望子成龍」級別嘅著緊，只係今次用咗「我最喜愛」去演譯。而「我最喜愛」獎項未必完全反映一個歌手嘅實力，呢件事係人所共知，否則就唔需要有「專業推介」同「我最喜愛」之別，但亦唔代表兩者不能共存。
當然，我諗花姐覺得當時觀眾唔係粉絲，就講得盡咗，忘記咗現今世上係「你在地面講一句，網上流傳百千遍」。不過花姐當年變得為人所熟悉，唔係就係因為佢喺《全民造星》夠一針見血，評語坦白唔客氣咩？當然我明白，娛樂圈之所都係演「偽」圈，虛假、包裝先係正道，直率真實或者只能有一剎那光輝，長遠嚟講都係徒勞無功 。