MIRROR無上下弦
MIRROR今年有好多小組同個人騷，近日先後有「FING小組」(Lokman、AK、Frankie、Alton )同Jeremy開演唱會。兩個騷有兩個共同點：一、騷後網上評價高；二、騷前不被睇好。
先講FING小組，預咗佢哋個騷主打跳舞，而揀歌同舞蹈嘅編排豐富，有驚喜亦盡顯誠意。尤其係一開場狂跳成20分鐘，可以話係破晒紀錄，好睇之餘，亦都挑戰體能極限。FING小組充滿男人味，女粉絲開心之餘，我見唔少男觀眾都好有共鳴，最驚喜係玩埋《Dilemma》呢首網絡神曲，玩味得來亦帶出一份「地」嘅共鳴。
4位成員表現都多人讚，Frankie唱得好咗、Alton嘅舞同感人分享，AK單手倒立，加埋我認為MIRROR其中一個完成度最穩定嘅Lokman，今次唱跳同樣無令人失望，仲放多咗感情，有進步。我一直覺得Lokman係新一代最all round嘅藝人之一，今次再獲確認 。
另一個我覺得完成度好穩定嘅係Jeremy。全晚演唱會以希臘神話為主題，Jeremy唱得好之餘，由服裝、舞蹈、仲表演埋豎琴，都非常配合主題，形象令人受落。最後一首歌時，佢覺得自己唱得唔好要求再唱，可愛得來亦係一個好好嘅態度。
讚到咁，大家又認為我收好多錢？錯啦，以上都係綜合網上反應，而我同大家都有同一個疑問，個騷咁好睇，點解兩個演唱會都只得一場？有人質疑係因為公司只願意投資在「上弦」身上，但睇返兩個騷，FING小組一開場就整架老爺車、Jeremy希臘神話嘅設計，成個概念、設計同服裝等都只係用一晚，客觀而言反而算係相當抌本。
我向知情人士打聽過，佢話冇加場嘅原因好簡單，就係供求問題。開一場都唔係好賣得晒，又點會諗加場？寧願唔夠貨，都好過太多貨。
「上下弦」嘅說法，從來只係街外人對不同成員商業價值嘅劃分。睇完呢兩個騷，我覺得由公司到鏡仔本身，都冇用呢個定義來決定要投資幾多或者自己要幾努力，反而見到佢哋一齊努力去突破所有定義，即使已經出道第7年。