大和解

Edan近日現身JFFT與黃淑蔓新歌《旋轉木馬》嘅MV，為兩大陣營投下震撼彈，有人覺得係大和解，亦有人批評Edan自製公關危機，但我覺得可能係Edan近年其中一個最值得肯定嘅決定。

先講返背景。2024年JFFT成員床哥曾經喺網上平台為叱咤頒獎禮「我最喜愛的組合」拉票，期間暗寸Edan只顧陪緋聞女友去旅行，引發大批MIRROR粉絲不滿。其後姜濤更以真身帳號留言，直指對方「無品」為隊友護航，最終床哥公開道歉，事件稍為平息。

相隔兩年，Edan參演JFFT嘅MV，佢嘅粉絲大感驚喜，大部分都覺得Edan願意放低過去，係成熟表現。娛樂圈講到底都係講合作，無必要永遠活喺過往爭執之中。反而姜濤粉絲就比較多人反感，認為難以理解當年鬧到咁大，今日又合作。當然亦有人認為已經過去，唔應該代替當事人去延續仇恨。

比起鏡粉圈內嘅糾結，大部分街客態度都相當輕鬆，普遍認為當事人都已經和解，旁觀者實在冇必要比當事人更介懷。甚至有唔少人因為今次合作而重新留意Edan，覺得佢幾玩得，願意突破固有圈子，形象比以往更加自然同大方。加上JFFT同Edan本身都幾有幽默感，風格意外地幾夾，反而令部分本來對MIRROR冇特別感覺嘅觀眾增加咗好感。

文章一開首，我話我覺得今次可能係Edan近年最值得肯定嘅決定。其實MIRROR近年其中一個挑戰，就係圈層化越來越嚴重，支持者固然忠誠，但街客市場卻似乎不如早幾年咁廣泛，仲好似有啲對立。呢個唔係MIRROR獨有嘅問題，當演藝事業越來越依賴原有粉絲支持，藝人接觸新觀眾嘅機會自然會減少，不過12個人嘅市場一齊縮細，隱憂似乎更大。今次Edan願意跨出一步，同曾經有爭議嘅對象合作，某程度上正正係打破同溫層嘅嘗試。

娛樂圈從來唔應該只靠自己人欣賞自己，今次合作本身已經係一件好事。相比起永遠停留喺粉圈恩怨，接觸更多不同觀眾，對於正需要擴闊街客盤嘅MIRROR而言，呢一步未必人人認同，但長遠睇，很可能係走得最啱嘅一步。