Netflix有套新劇叫做《消失的裂痕》，有張孝全同楊謹華呢啲一級演員，仲要係MakerVille投資。奇怪嘅係，如果唔係套劇上咗香港最多人睇排名第二位，都唔知道佢嘅存在。以咁嘅卡士，點解一啲宣傳都冇？我問過台灣朋友，原來連台灣都冇乜特別發布。以前Netflix有呢個級數演員嘅戲，最少都會搞個記者會，但呢套《消失的裂痕》，連宣傳都消失埋。另一邊廂，同日本合作嘅《綁架遊戲kiDnap Game》，因為香港有得播，都叫做有啲宣傳，雖然個記者會都係喺日本做。
事實上，MakerVille近年投資唔少海外項目，幾年前有套《八尺門的辯護人》攞好多獎，我睇過亦覺得劇情緊湊，早前有套文藝電影《少男少女》去咗韓國影展，都係MakerVille有份。整體而言，MIRROR之外，MakerVille過去幾年用咗唔少努力同唔同地方合作，無論電影定迷你劇集，宣傳好似都唔係好多。我估原因有以下3個：
1.善用資源，既然好多電影同電視劇都唔係放香港平台播，根本唔需要喺香港做宣傳。2.MakerVille嘅定位係製作公司，佢只要投資同製作好嘅作品，宣傳嘅嘢其實交返俾播放平台。但當然，話係咁講，製作方如果擁有大卡士，一樣有同平台討價還價嘅能力，自己落埋水做宣傳。不過呢種能力可能要等MakerVille製作更多海外項目嘅時候先有，急唔嚟。3.藝人管理部分嘅工作量，相信已令到MakerVille全公司忙到不可開交，冇時間再做內容及製作，不過其實呢方面先係MakerVille當初成立其中一個主要目的。話說回頭，都難怪嘅，整體香港嘅製作生意無論點做都非常難搞。如果係呢個原因，我唔會怪佢哋，只會覺得好可惜。因為《八尺門的辯護人》同《消失的裂痕》，即使唔係去到「神劇」級數，但亦證明香港嘅公司係有能力踏足世界平台嘅第一步，尤其今時今日，好多人仲停留喺個「講」字或者「想當年」度。