八點檔混戰
香港電視圈久違地熱鬧，8點檔將出現「三台對撼」。HOY TV推出《你的保安李寶安》正面挑機TVB《愛．回家之三代同糖》，同埋ViuTV嘅《八點直樂》。處境劇一直喺香港電視史上佔有重要位置，由《卡拉屋企》、《真情》、《皆大歡喜》，再到《愛．回家》，每個年代都有一套代表作。但近年面對串流平台等挑戰，影響力大大減弱，《李寶安》今次之所以引起討論，我認為有以下幾個原因。
首先係製作思維改變。HOY TV明顯唔係沿用傳統電視台拍處境劇嘅方法，而係將網絡文化、短片節奏，甚至電影式包裝放入劇集裡面。由劇名開始已經充滿玩味，再加上大量網上宣傳及話題操作，未開播已經成功吸引討論。呢方面或者同佢哋CEO本身做開數碼娛樂有關，善於利用網絡推動討論，製造到話題，已經成功咗一半。
第二係演員選擇比以往豐富。ViuTV早年都曾推出處境劇《娛樂風雲》，但唔係做咗好耐，受制於藝人庫存有限，又要力捧自家藝人，當時主要由ERROR成員演出。但近年唔同平台培養出好多具知名度嘅新演員同網絡紅人，Jeffrey就係一例，另外亦有唔少觀眾早已認識的KOL及網絡創作者加入演出。觀眾見到網絡上熟悉嘅人物參演，自然就有興趣睇下套劇。
第三係導演經驗累積。演員陣容係觀眾嘅焦點，但導演成熟程度先係一套處境劇可以持之以久嘅核心。ViuTV剛開台時，市場上新一代電視導演唔多，實戰機會有限。不過近年都出現唔少中小型製作，令一批新導演逐漸累積經驗，就以何爵天為例，經過幾年磨練，今次再拍喜劇，一定會呈現更成熟嘅效果。
三個台各自以不同風格爭取觀眾，有傳統處境劇、有新世代網絡喜劇元素、又有直播綜藝節目，競爭令電視台更願意投資創作，亦令導演、編劇和演員更多發揮空間，
當然對觀眾來講，亦有更多選擇。百花齊放，先係香港電視娛樂產業最樂見嘅發展方向。
