Lolly Talk的金主
女團Lolly Talk被指金主「閂水喉」，8個女仔半年無糧出，各人仲倒欠公司20萬，面臨解散，要搵新老闆注資。成軍3年嘅Lolly Talk，仲有冇下個3年？大家嘅焦點或者係班女仔好慘，我睇到嘅有以下幾個深層嘅啟示。
1.香港人真係極度善忘。Lolly Talk出道時，標榜自資出歌，拒簽唱片公司，獲得唔少鋤強扶弱心態嘅粉絲支持。當然佢哋背後其實有公司支持，喺行內已是公開嘅秘密。不過對圈外人來講，普遍都唔知真相。如今傳出「金主閂水喉」，大家竟然冇質疑點解自資歌手有金主？係善忘定其實一早知道事實？娛樂圈嘅所謂「事實」，其實係咪只係廣告標語？
2.對於班女仔被欠薪仲要爭公司錢，好多人都唔明，其實係娛樂圈合約中一種常見嘅模式，叫advance(預繳)。剛出道嘅藝人未有收入，但又要學唱歌跳舞，又要化妝置裝，咁公司都會「出住先」，亦可以話係對藝人嘅投資。當藝人有收入，公司就會根據合約分成，藝人亦要還返預繳。如果藝人紅得快，一早還晒預繳，就可以早啲分多啲錢；若藝人完約都未還得晒，有啲公司會算數，亦有公司會無限期延長合約，直至藝人還晒為止。
Lolly Talk的金主
3.一般人或者會同情藝人，投放時間同努力，仲要爭公司錢，不過大家都要諗下，即使唱歌跳舞幾叻，都要好多嘢配合先捧得紅，公司投放資源同金錢喺一個藝人身上，其實都係一種賭博。而有好多公司，都未必會將所有成本計入藝人預繳部分，例如梳化服、公司策劃同宣傳，或者開戲。所以藝人唔紅，公司係會蝕。
4.造星係一個非常長遠嘅計劃，Lolly Talk可以話係數一數二嘅香港女團，叱咤台上贏過好多對手，亦有街知巷聞嘅首本名曲，在商言商，如果搵到錢，金主係唔會「閂水喉」，而若果真係閂，就反映即使人紅歌紅有獎攞，都唔代表公司唔使蝕。喺呢行要走得遠，除咗藝人本事，實力雄厚嘅投資方及營運者都係關鍵。
結論係：無論藝人定投資方，想造/做星，一係識止蝕，一係問下自己有咩實力，否則浪費雙方時間同金錢。而對於萬中無一嘅成功者，就兩個字講完：珍惜。