由三分甜到七分苦
「人氣勝過COLLAR」，好多時傳媒仍然用這句來形容Lolly Talk的氣勢。8個《全民造星IV》落選者，靠自組成團，短短3年就有專輯、有演唱會、有廣告代言，仲可以去到日本參加偶像祭，似乎是「失敗者的逆襲」最佳教材。觀眾睇她們上台唱歌跳舞時時刻刻掛住燦爛笑容，背後卻原來有一個殘酷對照：有報道話，她們半年冇糧出，仲被通知倒欠公司20萬。
表面睇，Lolly Talk好似香港女團奇蹟：沒有大公司撐腰，但不斷有商場活動同廣告接，仲有專屬的電視節目，以及贏過各大頒獎禮音樂獎項。她們真心犀利，仲有人話8女人氣壓過COLLAR。問題是，這種運作模式並不是靠市場養活，而是靠幕後金主餵養，一旦「樓上閂水喉」，就真的「即使多風光都要清醒」。
知情者向傳媒爆料：Lolly Talk每次出騷要book保母車、化妝師、髮型師，排場十足，但收入要分8份，仲未扣除開支，就算是「神算」王梓軒都計到不會大賺。再加上近半年經濟不景，工作量急跌，完全是望落紅，盤數仲紅。到公司出單據，話Lolly Talk每人倒欠公司20萬，她們自己都嚇親。
對比之下，官方Instagram的回應就好有趣：
「Lolly Talk仍然同三年前一樣，8個人繼續一齊行得幾遠得幾遠。」這句說話，就好似維穩告示：她們只強調「團結」，未有正面回應「冇糧出」同「欠債」。齋講團結，其實是煙幕，反而更突顯背後危機。
問題不止是Lolly Talk一隊。COLLAR之所以仲可以維持曝光，就因為她們背後有MakerVille同ViuTV，以至母公司PCCW支持，無論是節目資源、宣傳渠道，甚至最基本的公司現金流，都比Lolly Talk有保障。香港觀眾成日鍾意拎她們來比較，講邊隊女團人氣高、邊隊得獎多，但現實是，制度、後台、安全網根本不同級數。
這裏牽涉一個更大的結構性問題：香港娛樂圈由來已久的「風光背後」。時不時都有歌手爆料，話自己有騷出只是表面風光，扣完化妝、服裝、交通費，最後袋幾百蚊。電視劇演員有時要自己貼服裝、車費，舞台演員靠兼職頂住生活。Lolly Talk今日的情況，只不過是將這種殘酷放大，變成女團版本。
而所謂「偶像產業」模式，香港一早有人想將韓國一套搬字過紙：練習生制度、公司鋪天蓋地宣傳、周邊產品經濟等。問題是，香港沒有一個大市場去養活這條流水線，最終只剩下一個空殼。
Lolly Talk有沒有機會走出困局？可能仲有。她們始終有一定粉絲基礎，但關鍵是：她們靠甚麼模式生存？繼續等金主科水？還是重新思考「香港女團」應該點樣行落去？她們的名字，經常被取笑聽落似「攞嚟托」，想不到現實與名字有幾分相似，而由《三分甜》出道，今日走到「七分苦」，亦未免有點悲哀。