話說早排華納DC宣布開拍旗下極受歡迎嘅人物小丑(Joker)外傳，但主演嘅唔係謝拉力圖(Jared Leto)，有傳會由馬田史高西斯監製，並由《醉爆伴郎團》導演Todd Phillips執導；而預告會開拍嘅小丑加小丑女電影，又會按原定計劃拍攝，繼續由謝拉及瑪歌羅比主演。
DC輸耐性？
阿媽我好亂？到底邊個先係DCU入面嘅小丑。DC喺電影界別長年輸俾Marvel，到底點解？呢件真假小丑案已經話咗俾你知。輸耐性。戴定頭盔先，廢事得罪華納。其實華納年底就有第一部「英雄聯盟」戲《正義聯盟》上映，可以話係期待度爆燈，亦係DC呢幾年嘅中期成績表，落實超人、蝙蝠俠、神奇女俠及水行俠等構成嘅超英宇宙。但若果小丑換人演，咁《自殺特攻：超能暴隊》仲係咪發生於DCU？
重鋪小丑出場？
大家都知，華納DC同迪士尼Marvel唔同在於，後者係分階段推出英雄獨立片，先建構獨立角色，再將個人特色帶入《復仇者聯盟》系列；前者則是先推出超人獨立電影，中段推出兩大人物Vs片《蝙蝠俠對超人：正義曙光》，然後又接一套反派聯盟戲《自殺特攻：超能暴隊》，再接一部《神奇女俠》獨立角色片，然後先接《正義聯盟》，再回到已經喺《正》片登埸嘅水行俠。可惜計劃不似預期，DC諗都冇諗過《自》片會仆到咁直，而且主因仲係小丑戲分過少。
年輕版選角更困難
DC決定小丑換人演，明顯想重新鋪排小丑入 DCU，但點解要諗條「前傳」橋出嚟呢？拍前傳，笨唔代表《自》片發生過嘅小丑情節冇出現過，而且要搵一個年輕演員演瘋狂小丑，比起當年選謝拉接棒更難。而謝拉仲係早幾年先換入，依家再換，似乎對觀眾太殘忍。依家仲有外媒預料，小丑外傳可能由里安納度狄卡彼奧主演？What！明明里安納度講過冇意欲飾演超級英雄，嗱，咪走數啊你。