《再見魅了緣》
今年對小本製作電影嚟講，係好重要嘅一年，事關今年幾部神片，大部分都係刀仔鋸大樹式成功，口碑好之餘又有好票房。而當中，好多都係喺美國獨立電影節「辛丹斯」跑出。辛丹斯下月21日嚟到香港站，今年將放映12部「美國辛丹斯電影節」作品及「辛丹斯電影節：香港短片比賽」得獎作品。
朗妮瑪娜X加西艾佛力《再見魅了緣》
要睇晒12部又真係有啲難度，如果要講必睇，梗係唔少得開幕片《再見魅了緣》(A Ghost Story)。呢部戲好有趣，據講劇組係秘密拍攝，由朗妮瑪娜同應屆影帝加西艾佛力主演，並由《Ain’t Them Bodies Saints》導演大衛羅利執導。故事好奇幻，講述一名丈夫(加西艾佛力飾)意外喪生後，化成白色床單下的鬼魂，回到家裡陪伴孤單的妻子(朗妮瑪娜飾)，睇住最愛嘅女人慢慢脫離自己。瑪娜擅長演呢類憂鬱寡言角色，今次將同影帝加西有親密床戲；而此片取景亦相當靚，劇組於美國德克薩斯州東北部城市Irving取景，片中主場景小屋，旁邊幾乎冇建築物，用大平原氣氛。
馬修海尼曼《無聲戰場敘利亞》
另一部要推薦嘅就係《無聲戰場敘利亞》，由奧斯卡最佳紀錄片提名《狙擊毒梟行動》導演馬修海尼曼執導。今次海尼曼貼身追蹤由敘利亞人成立的民間新聞網站「拉卡被悄然屠殺」，見證公民記者如何鋌而走險，喺受到死亡恐嚇及追殺情況下，義無反顧揭露威脅全球安全嘅恐怖組織「ISIS」罪行。呢部戲令我諗起舊年Netflix製作嘅奧斯卡紀錄片《白頭盔》，同樣聚焦於敘利亞戰事中，願意為和平犧牲自己嘅平民。
「辛丹斯電影節：香港」詳情： hk.sundance.org
《無聲戰場敘利亞》