因乜又想跳跳跳？
雲集本地街舞精英的《Red Bull Dance Your Style Hong Kong 2025》，將於本周六(6月28日)黃昏5時至晚上7時於尖沙咀香港文化中心露天廣場舉行。這個世界級街舞比賽2023年首次「登陸」香港，轉眼已是第三屆，以往兩年都在9月中旬舉行，今年則提前至盛夏開鑼。打風不成三日雨，天文台預測，禮拜六大致多雲，有幾陣驟雨，局部地區有雷暴，日間短暫時間有陽光，冀望天公造美，讓全場觀眾和舞迷大飽眼福。
今年繼續有16位選手出戰，在舞台上一決高下，爭奪代表香港出戰將於今年10月11日在美國洛杉磯Intuit Dome舉行的世界總決賽(World Final)席位，他們一半以Wildcard獲得參賽資格，另一半則參加公眾海選成功入圍。10男6女包括Gerin、Doug、LOKIN蘇樂鍵、Yobi、Aman、CK、YUEN AKA HOAX、Ho Tung、LuenMo Legion X、Niko、Drink Drink、Ivan Yim、Wing，還有曾經參加《全民造星IV》(2021)和《全民造星V》(2023)的陳玥伶(SiuSa)和田曜誠(Tsoul)，以及2023年香港站冠軍林悅榮(BOBBY)。
早前收到今屆比賽負責傳媒聯絡的公關大大WhatsApp短訊，問我可有興趣訪問參賽者？想了片刻，最終鎖定Tsoul和BOBBY──並非隨意應付，是但求其揀，而是他們有一個共通點：曾於2023年參加首屆賽事，相隔兩年後二人又再踏上同一舞台，所以順理成章，今次短訪的關鍵詞就是「因乜又想跳跳跳」。
因乜又想跳跳跳？
Tsoul先答。他說驅使自己再次出戰「RBDYS」的原因是兩個中文字和兩個英文字：「今次再玩都係『想贏』囉，因為贏咗係去『L.A.』啦，(「RBDYS世界總決賽」之外)同時其實係駁住幾個好大嘅popping battle，所以就想一次過去晒。」2023年，當時剛剛在《全民造星V總決賽》獲得第五名的Tsoul以Wildcard身份參加「RBDYS」，今次透過海選晉身16強，百多人傾盡全力施展「舞功」和汗水，爭取最後8席，競爭相當激烈。
我好奇，究竟這個比賽有何魅力，對人生有何意義，令Tsoul玩過返尋味？「我覺得呢個比賽對我嘅意義係，應該係會幫到我嘅事業，即係如果贏咗。其實喺觀眾嘅層面，佢哋唔係好知我哋跳舞人贏過好多比賽嗰個威力係點，但係佢哋會知道，Red Bull係搞跳舞event一個好有認受性嘅團體，所以呢個比賽嘅認受性係for普羅大眾，接觸面會再廣啲。」
回想兩年前踏上「RBDYS」舞台，Tsoul說過程如做夢那樣，「其實係好開心嘅，好爽嘅，一嚟有好多人圍觀啦，又有好靚嘅音響啦，可以跳舞俾咁多人睇，其實成件事係好……即係好發夢嘅畫面咁樣，同埋你可以跟唔同嘅dancers，有唔同style嘅人交流，其實某程度上都係俾普羅大眾宣傳到街舞嘅一個場合。」
「RBDYS」的賣點是現場觀眾握有生殺大權，以即時投票決定哪位舞者能夠晉級。當年Tsoul在第一回合不敵同樣今屆有份再戰的YUEN AKA HOAX出局，所以矢志要贏的他決心捲土重來不難理解，奇就奇在當年的香港站冠軍BOBBY一樣要再玩這個「舞林大會」，就令我有點「黑人問號」。
係喇BOBBY，點解呢？「因為好玩！同埋今年都係種子選手，所以想玩多次。」另一個激發點是追求自我突破的渴望。「人生有好多嘅選擇都係你嘅decision，譬如上天選擇，我自己選擇，同埋緣分嘅選擇。我就選擇我自己嘅選擇，所以點解今次再玩，睇下會有啲咩得着。」
2023年11月BOBBY代表香港遠赴德國法蘭克福參加「RBDYS世界總決賽」，此後兩年，他不斷遊走多個國家和城市，出戰不同跳舞比賽，與來自五湖四海的舞者交流，眼界大開。這些經歷和見識，統統變為成長的養分，「你有機會同一啲senior企埋一齊睇比賽，佢哋會傾偈㗎嘛，你會從中聽到佢哋分析，對舞蹈嘅諗法係點，我覺得係學到嘢，(無論)做人或者係跳舞上面……喺途中就會知道自己成長咗，但你問番我究竟呢兩年練咗啲咩，學咗啲咩？其實我一時三刻……可能我已經消化晒喇，我肯定知道自己係勁咗，就係咁簡單。」到底「獨自升級」之後的BOBBY有幾勁，今個周六尖沙咀維港海旁自有分曉。