又到年尾，又要「我最喜愛的」，尹光打入男歌手十強成為話題，連古天樂都被記者問回應，形容係「百花齊放」。究竟「光B」能否躋身五強，再好似古天樂咁做埋我最喜愛男歌手就未知，但呢個樂壇頒獎禮真正攞到最大份獎嘅單位，其實早已注定。
有行內朋友同我講，樂壇頒獎禮往往都係主辦單位同唱片公司、廣告客戶等，討價還價嘅最大籌碼。邊個會出席？咩人爭獎？幾多fans關注？主辦單位都會出盡力做大佢，確保頒獎禮嘅商業價值。有人同我陰謀論咁講，如果唔知點解今次入圍最後五強嘅，係一張有話題嘅歌手名單，唔止可以盡收公關效果，現場門票價值又水漲船高，下年仲可以加廣告商價，仲唔係真正大獎？哇，有冇咁黑暗呀，網民投票㗎喎，今年仲要唔用得太空卡，難度高咗咁多，我就睇唔到真憑實據話佢唔公平嘅。
對於歌手來講，有得入圍有得攞獎，梗係好過冇。Fans又開心，又好似確立到人氣。不過今年姜濤如果贏咗尹光，又好似唔係完全著數：
1) 贏咗又俾啲haters鬧。
2) 輸俾尹光，成就部分網民嘅喜好，成人之美。
3) 輸咗又能夠避免同其他MIRROR成員嘅粉絲互相殘殺，如果贏咗尹光，即係會贏埋其他MIRROR成員，到時又有啲真假粉絲，重演網上同系MMA。
4) 同樣道理，掉轉輸俾其他MIRROR成員，一樣唔好，所以最好輸俾尹光。
5) 贏咗，講嘅嘢都係嗰啲咁上下，輸咗先有機會顯示出風度。
6) 做我最喜愛的男歌手，有好多活動要去㗎之後，到時又俾人話「周圍都係」，換下新面孔都未嘗唔係好事。尹光去打《AllStar籃球賽》，點睇？
當然，真正嘅fans都會想見到自己偶像攞獎，但愛一個人，有幾愛唔係睇佢成功嘅時候你嘅快樂，亦唔係當佢輸俾人嘅時候，四圍鬧人，而係無論係任何時候，都唔會因為外界點樣捧佢上天或者踩佢落地，而對佢失去信心。一直默默支持，不叫囂，先愛得最響亮。
