當ERROR遇上Seven Tequilas

比起MIRROR，我對ERROR嘅發展更感興趣。一般人認為ERROR被放養，由零開始，事實上，從隊名到發展點止由零開始，公司係將佢哋由負數開始。

男子組合，但高度完全不一，仲要差好遠；唔改個有型嘅名，改個錯嘅名；第一個MV根本只係用返MIRROR嘅歌同景；之後一年歌曲全部標榜低成本，拍嘅節目偏鋒極端搞笑糟質。

但佢哋叫自己偶像組合。

有冇睇佢哋新歌MV？唔止搵孫佳君做女主角，老實，成個MV嘅攝影同美術，真係上乘之作，有成本，有技術，又有心。佢黑白嗰幾幕，同橙色背景構圖及燈光運用，係韓團嘅標準。歌曲旋律同歌詞都好過MIRROR好多歌(鏡粉不要追殺我)。

以上種種令我不禁好奇，到底公司真係放養，定係半策劃半流動嘅策略？而家就當然講乜都得，但睇下ERROR成長之路︰

保錡曾經因為偷食同鬧粉絲，人氣去到谷底，公司當時搵Mike導同阿暉幫佢哋拍個節目，重點放喺保錡苦練打石仔同結他，呈現「更好的吳保錡」，即使大家仍然覺得佢貪玩鹹濕，都會開始睇到佢認真嘅一面，配合之後跑步形象，成功洗底，唔使一年時間。

再睇193，口沒遮攔，寸同行、前輩、自己個台都寸，到底有冇被人照肺呢？我只知道佢不停有單曲，亦有好多機會上電視，擁有幾個自己孭飛嘅節目，包括《晚吹》同啱晒佢興趣嘅《Fashion Killer》。有冇鬧我唔知，肯定冇封殺。

仲有肥仔，又有跳唱又有溫柔單飛，亦俾佢甚至幫佢繼續排舞，時不時仲有幫鏡仔排舞嘅機會、令鏡粉都鍾意埋佢。

至於阿dee，就focus拍劇拍電影，開始有機會之後，連拍綜藝都不時強調佢想做演員、係一個演員嘅定位。

四個人嘅path有如度身訂造， 低谷時幫佢哋一把，做得好時又繼續有自由度。從負數開始，降低期望，實質上容易入屋。用低成本掛帥，其實係循序漸進加度身嘅投資。ERROR嘅成功，面嗰浸係人都知，底嗰浸或者就好似佢哋新歌嘅歌詞：「記住，你所見到的，只有真相的邊」。