MIRROR、ERROR有今日成就，很多人在背後出力。
鏡仔Jer、Anson Lo、姜濤、Edan仲有Jeremy，先後舉行個人演唱會，各有亮點，fans讚咗好多，haters亦批評咗唔少，在此不贅。
鏡仔以不同組合都開過騷，個人演唱會真係第一次，出道未夠5年已經成就解鎖，對幾個廿幾歲嘅後生仔來講，有辣有唔辣，佢哋喺演唱會嘅深情鳴謝環節，聽得出佢哋興奮之餘，都有懷疑人生，當中有幾段我特別深刻︰
Anson Lo︰提到花姐為佢喺屋企喊咗一朝，因為搵佢參加《全民造星》時，唔知呢個「MK仔」可以行幾遠。而4年來同佢一齊搏鬥、捱通頂，而家Anson Lo可以喺亞博開4場solo確實唔容易，為佢感到驕傲。阿Lo仲爆自己一見到魯生就想攬住，形容係其中一樣俾到鎮定同鼓勵佢嘅來源。
Edan︰話今次solo識得享受舞台，係因為之前去馬來西亞演出時，魯生話過佢一繃緊就無咁charm，又問佢係唔係唔開心，令Edan不時提醒自己要放鬆。佢亦都講咗句花姐為佢哋犧牲嘅嘢，無fans可以想像得到。
幾段看似簡單嘅對話，聽得出對幾個鏡仔來講，係懷疑人生時嘅支持。鏡仔同金魯花嘅小片段，一直幾吸引我，包括魯庭暉公開講過，最初公司只想簽《造星》頭三位，最後3變12，全因「唔捨得」。花姐堅持簽阿Jer、魯生喺決賽睇中Jeremy，幫佢力挽狂瀾入MIRROR等，MIRROR嘅組成，唔止係「星味」，仲有「人味」。
其實舊年紅館演唱會事件之後，少咗聽到鏡仔講公司管理層，點解呢？無他嘅，成件事進入司法程序，單案仲要明年先開審，應該有排都冇咩可以公開講。外界成日批評公司推班鏡仔出來擋，鏡仔做幕前又要成日見人，咁咪只能夠唔再提咁多公司管理層囉。
公司同藝人，從來都唔係僱傭關係，工作以外，身心健康、成長疑惑都要照顧埋，或者更似係父母對子女嘅陪伴同栽培。好多片段，好多感情，得佢哋自己先感覺到，點講都講唔清。
舊年今日，MIRROR休團，之後以一首《We All Are》復出，當中有幾句係咁嘅︰「時鐘滴答秒針走過，時光匆匆我即使挫敗過，請信任我，真心的栽種最後會結果。」作詞人只寫team MIRROR，江湖傳聞，魯生有份寫。