MIRROR的電影路

今年3套賀歲片，各有捧場客，有彈有讚。《臨時劫案》有人話故仔麻麻，亦有人讚郭富城造型特別，演技破格；《飯氣攻心2》有人覺得冇上集咁好笑，但又多咗感動位；至於《盜月者》有人話見到鏡仔就唔開胃，亦有人讚︰竟然節奏流暢睇得開心喎﹗

唯獨讚鏡仔嘅戲，會用到「竟然」兩個字。

呢個係全世界偶像面對嘅共同問題：靚仔跳唱叻多人鍾意，就一定唔係好演員。觀眾亦會覺得搵鏡仔拍戲，片商只為有粉絲刷票房，唔會真心拍好個故仔，中伏機會非常大。

事實上，之前有電影公司搵鏡仔，無非為咗首映禮盛況空前，討論度同票房都有保證。呢方面連鏡仔本身嘅經理人公司都望塵莫及，旗下嘅演唱會同劇集等，公司都將宣傳工作量減到最少，反而其他公司就當足旗下藝人咁款，一日跑好多場謝票，做好多訪問。

講返正題，有鏡仔係咪就冇好故仔呢？

Makerville 嘅《命案》係最好嘅例子，攞咗「電影評論學會」嘅最佳電影，金像獎亦有多項提名，但就偏偏冇最佳男主角。Lokman表現明明好多人讚，亦入到電影評論學會最佳男主角嘅最後5強，偏偏金像獎呢啲業界投票獎項就唔入圍。反映鏡仔喺跳唱嘅成功，令佢哋喺其他方面要更努力先會被人睇到。

又分享一個八卦消息，鏡仔齊腳嘅《12怪盜》，擺明係開開心心粉絲向嘅電影，我就唔明點解唔放賀歲片，要等復活節先上，到時鏡仔又去咗世界巡迴，宣傳謝票等都難安排。聽講係因為有部分鏡仔嚟緊會有其他電影上畫，提名新人獎機會高過《12怪盜》呢類喜劇，公司為咗還鏡仔嘅心願，特登將《12怪盜》延遲上畫，唔計落上年新人，令佢哋有機會爭明年嘅新人獎。睇得出公司除咗商業考慮，都想鏡仔有機會喺其他方面爭取獎項，獲得認同。

鏡仔過去幾年帶旺樂壇，希望佢哋喺電影方面都做到呢個效應，票房口碑都好。畢竟電影業近排好似打回原形，需要全方位一齊令香港電影再百花齊放。