有次路過油麻地的百老匯電影中心，見到舞台劇《冚家拆》的宣傳海報，擔正這齣獨腳戲的演員叫黎濟銘。工作關係，我當然知道黎濟銘是誰，畢竟他近年在幕前相當活躍，但對於普羅大眾而言，他大概是那種見到個樣會覺得熟口熟面的演員，但問到他的名字是甚麼，最多只能噏到口唇邊。
數數阿Ming近年的演出：2024年上畫的《談判專家》裏，他飾演張振發(朱栢謙)的同事，模糊到無法肯定角色有沒有名字。他說：「有㗎！叫唐端。戲入面好似有嗌過。」同年在ViuTV首播的劇集《十七年命運週期》，黎濟銘飾演「回力劇社」創辦人兼導演歐陽柊；咁啱得咁蹺，劇社成員、綽號「番茄」的成年版陶嘉韜由廖子妤飾演，而在電影《從今以後》，他倆就變成兩公婆，阿Fish叫Fanny，阿Ming叫阿琛。
早前掀起熱話的另一齣ViuTV劇集《哪一天我們會紅》，阿Ming的角色叫王特隆，別稱「西瓜」，是那個多次欺壓Jacky(蘇振維)與Gthan(張毓軒)的衰格編導；還有舞台劇《最後禮物》的青叔、舞台劇《月明星稀》的阿明(他憑此獲得「IATC(HK)劇評人獎」2024年度演員獎)、舞台劇《The Restaurant餐廳》的銘、電影《盜月者》的阿銘(給白只摑了一巴)、陳慧琳MV《我的親人》的謝君豪另一半，以及劇集《大誠實家》的陳本質等。除了《最後禮物》和《大誠實家》是2022年的舊作，其餘統統於過去一年半載見街。
2016年香港演藝學院戲劇學院畢業，頭幾年順理成章主攻劇場，離開校園後第一齣參演的舞台劇，是由陳曙曦執導、「天邊外劇場」作品《李逵的藍與黑（東北村落版》。雖已是9年前的事，阿Ming的記憶依然具體：「環境劇場嚟，即係用個真實嘅環境去做戲，我哋係喺一條村裏面做，啲觀眾係會周圍走，有啲戲會喺棟樹下面做，有啲喺啲爛屋度做。呢個故事係改編自《水滸傳》，我飾演林沖。」團隊中還有身兼演戲和負責現場音樂的張蔓姿，她是黎濟銘的同班同學：「佢主要係做音樂同唱，有啲位搞下笑就會同佢有啲互動。」
兩年後，2018年3月，同樣由陳曙曦執導、「風車草劇團」的「忙與盲」第三部曲《哈雷彗星的眼淚》，與「風車草三寶」梁祖堯、邵美君、湯駿業，還有「蝦頭」楊詩敏、黃呈欣和林子傑合作，是阿Ming第一次的商業演出。兩年又過去，2020年7月，余香凝與吳嘉熙合唱單曲《天地分裂》，MV由Maggie Leung執導，阿Ming有份客串，對手是資深舞台劇演員黃慧慈，只在鏡頭一閃即逝的鬧交戲，有興趣可以定格在3分38秒至3分39秒睇真啲，「真係閃過㗎喳，勁難cap！」
雖然只得一秒戲份，卻從此改變阿Ming往後演藝事業軌跡，背後的「助攻王」，是演藝學院師弟周漢寧，「嗰次就係『周0』介紹我去拍，叫做識咗導演，但其實我唔覺得佢(Maggie)對我有印象，因為真係好短嘅一場鬧交戲。跟住之後佢就搵我拍《時光邊緣的人》，所以佢(周漢寧)算係拉咗我入行。」
《時》是陳健安2020年的派台歌，阿Ming在MV故事裏飾演一位擁有不死身的千歲奇人，為帶出歌詞意境，導演安排他與多位女演員在鏡頭面前談情，包括簡潔雯、陳琳欣、余子穎，以及當時尚未榮膺金馬影后的新晉演員鍾雪瑩。「可能因為有鍾雪瑩，《時》引起行內人注意，阿溫(應智贇)都係睇咗呢個MV先認識我，之後搵我拍《大誠實家》。」
大家或許以為阿Ming從小經已充滿表演慾，實情完全相反。「我對於做戲從來零經驗，唔鍾意唱歌、跳舞，讀中學時，因為我係籃球隊，我哋suppose係有型嘅人，覺得玩話劇係一件好lame(不酷)嘅事！」直至在理大唸書期間，有天從天水圍上學途中，在輕鐵站見到一張劇社招募海報，命運從此逆轉。「唔知點解，嗰日突然間『Boom!』，好似幾得意噃，不如試下啊。結果就發現自己係咁鍾意嘅，可能一直都冇機會試，但真係冇得唔信緣分，嗰個calling就捉(帶)我去到而家。」喜歡到一個程度，完成理工大學的商科學位課程後，阿Ming決心轉到演藝學院多讀四年書，畢業後成為全職演員，直到今天。