水可以冒牌，笑亦可以扮，但我可以好肯定，在1988年收看《點解咁好笑》時所發出的連串笑聲，都是real——real，即是真實咁解。
1) 讓我笑得最瘋癲的一次，必定是某一集的《講數學英文》環節——留意，這一句讀法不是「講/數學/英文」，而是「講數/學/英文」， That Means「透過講數這回事來學習英文」——用一種不良分子的不良事宜，去做具有教育意義的事情。
2) 講數雙方，林敏驄扮演的穿頭標和杜德偉扮演的皮禮士糖，雙方各自帶了一team人，在停車場會合，整個setting，基本上，是明扮Michael Jackson《Bad》的MV，但音樂，則配上Michael Jackson的《Beat It》。
3) 就在《Beat It》助燃，劍拔弩張之時，穿頭標和皮禮士糖先口角——口角，自然涉及說話，特別在雙方說話裡夾雜大量英文單字，例如「qualification」，又例如「cheap」，而且隆重其事，附上一把畫外音進行解說。
4) 當中有幾個我尤其深刻：「『alright』，意思即係一切妥當，唔alright，即係唔妥，記住，要捲脷。」「『face』，呢個字易解啲，通常落嚟香港三日都識㗎嘞。『face』，即係俾面咁解。」「『耍冧』，係離開正音較遠嘅字，正確嘅讀音係『salute』，即係敬禮咁解。我哋讀多一次：salute！多謝。」
5) 當然不少得「fight」：「『fight』，即係打鬥，用個貼切啲嘅中文字去解釋，就係『鍊過』，小朋友要有大人陪同先至好講呀。」結果？穿頭標和皮禮士糖透過中英夾雜的說話，講掂數，以和為貴。
6) 第二日返到學校，早會前，竟發現不少同學都在背誦《講數學英文》的解說，當然不能背到100%，但沒九成都有八成半。
7) 那是一個簡單的年代，人的娛樂方式單一，一個電視節目，足以在沒有超前部署的情況下，成為不同朋輩之間的熱門或現象話題。
8) 而更重要的是，那時的人都比較會笑，肯笑，不吝嗇笑，絕少人會專登用笑不出去抗衡一個搞笑節目，藉此顯出自己品味高尚。當年的人，的確比較容易笑(亦有一種說法，指當時的人用笑去面對不確定的未來)，兩個電視台，都會製作類似《點解咁好笑》的節目，《開心主流派》、《笑聲救地球》、《叻人新世紀》等等，方法和規模不盡相同，但同樣百無禁忌，不時拿取現實中的人和事做材料搞笑，有理由相信，在某些嚴格嚴肅的人眼裡，等同冒犯，但當時的受眾或許比較單純，不會經常諗埋一邊，但求好笑，笑完就算。
9) 你大可以說，這些搞笑節目都是用來攝時間，但製作都認真，認真到一定會有主題曲；像《點解咁好笑》那一首，在接近四十年後聽回，除了必然有種基於懷舊而產生的溫暖和感傷，更會哭笑不得，第一句就開宗明義高唱「香港社會有許多好笑事」——今時今日香港社會還有好笑事？sorry，有的都是好事。
10) 今天若眼光光，向我們來望望，傷心和沮喪，同在笑聲裡埋藏。是的，笑聲最大作用，就是方便埋藏各種不便公諸於世的感受情緒。而一句早晨，亦勝過諗一段statement。