陳坤耀
港大專業進修學院(HKU SPACE)今年迎來六十周年，董事局主席陳坤耀噚日就約咗Ray一齊話當年，佢講番原來於港大碩士畢業後，第一份工就係於1969年加入港大校外課程部任職Staff tutor，主要為課程搵講師及編排上課時間表。現任東亞銀行主席李國寶當年仲向陳坤耀自薦尋教席，最後當然請咗佢，幫手教Management Information，而家兩人仲成為老友。
陳坤耀展示一本1969年的「課程手冊」，雖然手冊已有近50年歷史，不過仲保存得好好，可以清楚見到李國寶的英文名(David K.P. Li)，當年學費睇落唔算貴，45元可上12堂，每堂一小時。
陳坤耀又自爆，讀皇仁書院時本來打算行醫，走典型「皇仁仔」嘅路，在高考已選讀大學的理科學系，但因睇完諾貝爾獎得主John Hicks的著作《Social Framework》受啟發，決定揀科嚟個360度轉變，全部揀晒中文、中史、歷史及地理，最後高考成績唔錯，仲入到港大文學院讀經濟系。
HKU SPACE現舉辦六十周年巡迴展覽，市民可以見識到不少同港大有關的歷史文物，畢業證書及課程手冊等都可搵到，本周六(27日)至下月4日，會在HKU SPACE金鐘教學中心展出，免費入場。
