次次都講Xbox Series X｜S同PlayStation 5都驚大家悶，更何況好多人都買唔到機，真係得個「吹」字。幸好任天堂Switch都不甘寂寞，年尾推出王牌系列大作《薩爾達無雙 災厄啟示錄》，而且係同《曠野之息》有直接關係，講返100年前嘅世界，製作人依然係系列主腦青沼英二，連同大佬級製作人早矢仕洋介同總監松下龍太，絕對係信心保證。今次《災厄啟示錄》亦冇令人失望，雖然唔少人似乎對「無雙」有偏見，但實情係同類遊戲類型嚟講，真係好少遊戲可以同各款「無雙」比較，就講年頭《女神異聞錄5亂戰魅影攻手》已經係一例，ATLUS自己一個做都未必有咁好質素。坦白講，土下座呢個月俾兩部新世代主機直接衝擊完，要玩一隻30fps、偶然會Lag機、讀取時間又耐嘅遊戲，正常都會好反感，但《災厄啟示錄》勁在就算明顯冇人哋咁靚、咁快、咁流暢都好，遊戲性依然超高。只要你玩過《曠野之息》就會更加喜歡，玩過就明，絕對唔係一般「無雙」遊戲咁簡單！