我日日追住保守黨黨魁之戰。波叔(約翰遜)一直形勢大好，於是有人日日要攻擊佢了。最新之目標，係佢的失言史，將佢由倫敦市長到外相到佢反歐洲一體化等言論，炒埋一碟，質疑佢有冇能力去做首相。咁我地長期觀察英帝政治的朋友，自然好努力地去分析，批評者寫呢啲嘢，目的係點呢？
目的自然會追住亨叔(侯俊偉、圖)，睇住佢點樣對付波叔啦。亨叔呢，外面啲人覺得佢文質彬彬，即係太和善，同美帝無法合作，唔係好掂。保守黨人呢？覺得佢響歐洲問題太軟弱。咁得番兩個星期，佢又有乜嘢牌要打呢？呢個星期係香港牌。
點解呢？大家先記住現首相May姐同埋外相亨叔，外交有兩大特點：親中，同埋親中。響保守黨歷史上，佢地係極親中的領導。咁佢地就響香港問題方面，一直都係採取迴避的態度。老實，信英帝會幫香港人，真係點止太陽會西邊升起，連黑洞都可以變番行星。我估佢地比香港自由黨更親中。
好啦，無啦啦，呢兩個星期，亨叔又發功，連續兩個訪問，一於去盡鬧北京（若以美帝侵侵角度，完全唔係鬧，簡直係溫柔的提醒，同say個hi冇分別)，又講聯合聲明冇完結，又話香江民主自由咁樣削弱落去，會有嚴重後果，講到似層層。咁大家又忘記咗，依家係保守黨領袖之選戰，選民係保守黨國會議員。
是咁的：由於西瓜偎大邊，好多疑歐派果啲，即係波叔的鐵票，早就歸晒位。至於立場溫和嗰啲，又疑歐嗰啲，立場左右搖擺嗰啲，仲響度心大心細，因為佢地覺得波叔揀唔落，而亨叔又太軟弱，如果亨叔唔拿啲mojo出來，真係揀唔落。
而親歐派嗰啲，又唔一定揀亨叔。呢班友以肥彭等人為主（我用肥彭個名因為香江人識佢而已)，響香江問題上素來持守撐港反中的態度。佢地一直覺得May姐親中，放棄香港，唔得！如果佢地今次唔支持亨叔，亨叔隨時輸到褲都甩。咁亨叔為了取得呢班人支持，於是就開足火力，撐香港鬧北京。咁又撞啱，近期香江的事態真係好危急，依家又有一班民主派人士訪英，而香江的武打片段，日日響英帝電視台出現，咁外相點都要硬些少囉。係囉，不過，如果亨叔做了首相，相信即刻變番溫馴。哈！英帝撐港？咪發夢。波叔響做外相嗰時，有冇撐過香港？None!
台灣選情都明朗化。蔡英文選戰重上正軌。好快佢又外訪，又響美帝停留。大家以為台美一家親？卜睿哲早幾日響美帝一個研討會講，唔好誇大美帝國會響對台政策的影響力，北京也不應誇大佢地所認為，美帝國會響呢方面的挑戰。即係話，大家唔好對美帝國會支持台灣的假象所蒙蔽，唔好一廂情願。值得香港親美的泛民朋友三思。
倫敦大學亞非研究學院法律系博士