我地呢啲國際人，講得唔好聽，就真係唔覺「送中」條例有乜big deal。因為世界那麼大，我地這麼小，商人中產驚「送中」，又唔係我呢啲平民百姓出事。不如我地關注下世界大事啦。呢幾日要關注委內瑞拉(圖)，因為一月以來，美帝要委國總統下台之後，情況膠著到依家。咁前日反對派瓜伊多走出來要推翻現總統，今次似乎要志在必得。
大家要理解，侵侵上台之後，成日話要響阿富汗、伊拉克撤軍，四圍同人講美帝唔應該四圍搞嘢，浪費軍力。所以，響呢啲說法之下，如果美帝立時出兵去外國干預人地，就等於自打嘴巴。當然，如果唔想咁樣做，一係就搵黑手(即係僱傭兵)，一係就搵白手，即係搵委國軍隊裡面嘅叛軍一齊合作。
咁凡事都係冇絕對嘅，可能美帝呢一刻知道，出兵對自己不利，寧願唔去做住，等遲啲如果總統選舉期間，需要之時，又或者如果聽日出兵對民望有利之時，就可以出兵鎮住個場。你睇下，依家民主黨大老響度係咁煲拜登出來選總統，如果拜登一出，到時真係有場選舉大廝殺，咁前前後後，侵侵可能都要出怪招，派兵以示國威也。
美帝係無處不在。以前中美和好，亞太地區有事，大抵都係有商有量解決，睇場嘅係日本，即係美帝之亞洲睇場，同埋偉大之祖國。咁以前祖國都好識做，當佢地知道，有啲嘢可能真係郁到美帝之底線，咁咪退一步，又或者一人讓一步，日後好相見。但係，自從中美大國兩個交惡之後，情況好唔同。美帝個招數係，響全球，記住，係全球，即係太平洋島國都唔會放過，問一個問題：你親美，定係傾中？
邊有得避？
以前台灣總統選舉，美帝因素係重要，但今時今日，如果台灣政客要選總統，係要先去美帝嗰邊問前程。美帝派乜嘢人同佢接觸，就係關鍵。柯P去美帝走一轉，公開場合一個美帝高官都冇得見，咁佢都知，除非佢真係有神蹟做總統，否則都係收檔。柯P訪美後，成個人靜晒。Korean Fish去完華盛頓又話國防要靠美帝，激到佢啲粉絲發晒茅。English Choi依家就全面傾美，美帝同佢不知幾好關係。剛剛又見郭董訪美，well，選舉嘛，唔去美帝拿不反對通知書，你點選？
所以咁樣就折射到整個東亞地區政局囉。兩岸政局係美帝同北京之爭。三地政局呢？以前中美和好，美帝唔會公然叉隻腳入來香江，因為中美大家都畀面，總有底線。依家美帝監生要叉隻腳入來香江，仲要借一些事態去迫北京，咁就好鬼煩。因為依家主理香江政局嘅西環，唔係外交人員，佢地直線收柯打做嘢，點會理美帝呢？一旦香江事務搞到美帝反枱，到時又會影響番中美關係。你話依家香江政局係未好複雜？