執筆之時，英帝首相波叔究竟贏幾多，真係好難估。英帝係單議席單票制，國會佔多數就組閣，國會議員過半就完全執政。早前波叔仲應該穩勝，點知民望就一步一步碌出去，於是早幾日波叔親自落場打告急牌，扮晒一部電影咁樣祈求選民投票俾保守黨過半完全執政。Work 唔 work?至少波叔肯落場乞票，可知形勢幾惡劣呢。
佢哋選前係擔心，贏就係贏硬，而唔可以過半而已。如果唔過半，就要同細黨合作。之前波叔係同北愛小政黨聯合執政，點知人地小黨呢，就唔鍾意波叔同歐盟傾嘅刁，所以就響國會投票時反對波叔嘅歐盟協議，保守黨同小黨私下有牙齒印。波叔今次大選唔過半的話，嗰堆細黨經歷幾屆同保守黨合作真係有辱無榮，未必肯願意再同波叔合組聯合政府。例如自由民主黨，響卡梅倫年代同保守黨合組聯合政府，原本係希望爭取一些執政經驗，準備未來走上第二大黨之路。點知佢地俾卡梅倫玩到飛起，結果呢？自己支持者覺得自由民主黨大老為了執政埋沒良心，而自由民主黨之選民就覺得呢啲大老執政之後，樣樣嘢都跟晒保守黨，而且又無法履行政綱。結果卡梅倫下台之後，國會重選之時，自由民主黨幾乎輸清光議席，近乎亡黨咁滯。前車可鑑，邊有小黨仲敢同保守黨合組聯合政府呢？
同港人有乜關係？英帝保守黨早就睇退歐後嘅政治格局。佢地唔可以明目張膽咁親中，但又缺錢缺人。最好就係響四周圍搵返啲有錢又有面又有China money嘅人，填補脫歐之後的人才及錢才。香港人呢，精英嗰堆，識英文又肯捱肯搏兼且又唔係好理英國內政，其實係適合英國佬嘅，其他英聯邦嘅國家，新加坡又得，馬拉又得，汶萊更加好。總之，開晒門俾舊殖民地嘅人，將佢地資源吸晒回去倫敦，頂得一陣得一陣。所以，你哋有時間咪換本英國護照啦，點知幾時有用呢？
仲有個幾月就係台灣大選，依家勝負基本上已好清楚，English Choi應該輕鬆過關：連任做多四年，部署四年後矣。依家English Choi做得最多嘅應該係落區幫立委選舉，因立委選舉響好多處仲係五五波，立法院仲未過半。當然近半年綠營打嘅香港牌，貼近當地人民心聲，咁反而係藍營咁搞落去係點呢？大家要知道，藍營仲有唔少後生一代政客冇出，佢地今次都冇盡全力去幫Korean Fish。早前黨中央俾Korean Fish選，因唔想Korean Fish啲深藍粉絲鬧黨中央嘛，咪推佢走最後一程。咁Korean Fish如果輸咗，深藍嗰堆自然會收聲，四年後，依家藍營精英又會再玩過。總之，藍營內嘅政治精英，先至係操盤者。佢地唔出手，邊個都會輸到冇朋友。香港人睇台灣政治呢，唔好太投入啦，始終係人地嘅事，明白未？