出稿今日12月10日，土下座可以正式宣布，三度延期嘅《電馭叛客2077》(Cyberpunk 2077)卒之出咗啦！明明上次實牙實齒話11月會出，仲用埋奇洛李維斯做生招牌，話隻「金碟」已經印好，但截稿時都未見到Game派街，點解又咁肯定今次唔會吹水？原因好簡單，因為外國媒體已經出晒reviews，當然平均都係滿分及高度讚揚，部分外國YouTuber甚至出埋Gameplay片，大家自然就更清楚今次不再延期。加上土下座做呢行，其實兩日前已經睇到隻Game嘅大貨進入包裝階段，出稿時都應該可以放心講：「《Cyberpunk 2077》真係出咗啦！」
作為年末最後一隻超級大作，無論期待度同話題性已經率先跑贏大市。據啲Game舖行家講，訂貨嘅人比《維京紀元》更多，仲要係突然爆上去，唔係慢慢增加嗰隻。雖然土下座諗唔明有咩宣傳方法，可以令隻Game未出就已經人人講緊甚至買埋，但對零售嚟講，多隻大作當然係好事，畢竟PlayStation 5同Xbox Series S｜X都唔夠貨賣嘛！最後就係，今次《Cyberpunk 2077》係冇「閹割」版，大家可以放心！不過記住呢隻係限制級遊戲，小朋友唔好玩喇。