國泰航空早排風風雨雨，人事大執位，唔少人轉咗去同系太古(中國)，發展大陸市場，而曾經做過公關部一哥的程鼎一(Dane)早前亦已辭職，去向於昨日揭盅，原來係去恒隆地產做執行董事，負責管理集團綜合服務部，而咁啱恒隆地產行政總裁陳南祿當年亦係國泰高層。
Dane係國泰MT(見習行政人員)出身，有啲似政府AO，差不多每三年調一次職，佢30年來做過多個高層職位，做公關阿頭時，同傳媒關係唔錯，近年出任銷售及市務董事，面對航空業激烈競爭，可以話場場硬仗。今次加盟恒隆地產，負責範疇更廣，包括物業事務、優質服務管理、園藝、保安服務及科技體驗等。Ray在此祝Dane工作順利。