你地有所不知，成長決定性格，仕途決定想法。一個仕途上過關斬將嘅領袖，好多時候就會因為上位過程之經驗，框死咗自己嘅施政想法。基建發展響八十年代係不二法門，咁響廿一世紀，基建填海又係一啲北方大國，沿海地區城市發達之搵食模式，響呢啲思維下，當呢班人做咗領袖之後，推動填海變成理所當然。
佢地啲想法好簡單：填海呢度唔畀嗰度又唔畀，東大嶼填海就最理想啦。香江幾十年都係靠填海搵食，而且又唔會斬除大家鍾意的郊野公園，點只雙贏，簡直個個都贏。呢啲基建，點都係對香江長遠利益有利啦，點睇都係幫下一代兼下下一代造福，依家講到禍延子孫咁誇張？
此言差矣。查實大部分人唔反對填海，問題係點填。好打得搞嘅填海，完全係破壞性建造。最大嘅疑點，是政府搞大型工程，點都唔會好似篤數一樣，話幾多公頃就幾多公頃，明明腳痛領袖搞嘅智庫，都仲係講緊1,000公頃，點解忽然變成1,700公頃呢？一路以來，好打得都係冇詳細講呢條數係點樣論證得來。倘1,700公頃係點變出來？
有路邊社老友A告之，佢地嗰堆發展大嶼山之啦啦隊，都唔止係老人家，仲有唔少中(環價值)坑，臨退休都仲要不休之專業人士，鍾意發熱發光，佢地仲係好堅持填海發展，仲認為東大嶼都係一個好地區。佢地同官府咁熟，天地線都已搭通晒，但響好打得公布填海1,700公頃之時，事前一啲風聲都冇，聽完都呆一呆。
聽完呢啲消息，係人都估到，東大嶼填海基本上都輪唔到好打得決定，而應該係由上而下叫佢做嘅嘢。我先假設，呢件由北方落柯打之任務，都係出於好意，都係想香港好，都係想香港經濟長遠係有競爭力，但係如果上面響好打得個工作小組未有共識同最終報告之前提早宣布填海，其實都令好打得好惡做，畀人感覺，佢已經響好多方面，冇晒自主性啦，估唔到連填海都要畀「腳痛基金」指住鼻哥教佢點做，好打得真係乜嘢面都冇晒。
所以，我都係用陰謀論睇事物。原本大家都估，好打得都會搞填海，不過係東一忽西一忽，得嗰幾百公頃，然後仲要話等埋土地小組開完會至會最終拍板。如果係咁，「腳痛基金」就會大大聲咁講，仲要抬埋華弟出嚟，話幾百公頃唔夠㗎，一千至得㗎，「腳痛基金」之方案先至係最好㗎等等。一副成功爭取，為民請命個樣都出晒嚟。
點知好打得都唔係傻嘅，既然上面落柯打要填海，佢點會畀「腳痛基金」攞晒彩？如果咁都得，香江點只有兩個太陽（金鐘加西環），加埋「腳痛基金」就有三個太陽，到時好打得咪提早跛腳？依家出1700公頃，全部玉石俱焚。英文叫做decoy，明白未？