成日幫襯某魚檔。老闆係一位婆婆，幾年前退休咗一排，後來又出來睇檔。每個C6或C9，只要常去街市，總有幾檔已經買到熟晒，婆婆呢一檔，我去買半斤蝦，次次都多幾隻，真係唔好意思。
婆婆話，個市好靜，隔籬嗰檔，已經又放租放唔出，老細減租都冇人租。對面檔口，自從雜貨舖走咗之後，一直都租唔出，減都冇人做。咁又係，一個月賣一百箱蠔油都唔夠交租啦。不過，我都好坦白：婆婆，如果唔係要買新鮮魚，我都唔落街市啦，上網搞掂啦。
轉頭嗰檔，係筆者之午食canteen，一碟招牌飯，已經要成八十蚊。加埋飲野，一百蚊有找，真係好貴。老細話，星期日搵唔到洗碗，冇開星期日了。舊年業主話加租，兩成，當時已經想執咗佢，後來都係覺得，響屋企冇嘢搞，日日睇電視都唔係辦法，於是都夾硬做落去。老細話，隔籬嘅雜貨舖，業主加三成租，即刻唔租走人，依家招牌飯加杯汽水都要一百蚊，下年大業主話加租，我估一碟飯都要賣成九十蚊，咁鬼貴，邊有人來食呀？
行過去另一條街，係老友開之食肆。裡面好細，午飯一百蚊樓下。老友話，因為餐廳嘅股東之一，同呢間舖大業主好熟，於是租務上有得慳，所以先至可以響食材上落啲功夫，先至有一百蚊樓下之午飯。我真係唔識貨，唔多啲幫襯佢，因為老友想做多一陣摺埋佢。老友話，隔籬間泰國菜餐廳，生意唔錯，不過業主話，將會加租三成。泰國老細話，加三成租？賣牛丸粉一百蚊一碗都唔掂啦，更何況邊有人會日日用一嚿水食晏咩？
返到學校，撞到老友L。佢不嬲熱愛學生，不過，舊年佢已經知道要減薪，今年聽到上層講，教埋今個學年，即係下年六月左右，佢都會被人摺埋。係呀，L博士，博士都要減薪冇嘢撈。香港地，讀多啲書係冇出路，學術散工仲要讀咁多書都冇嘢撈，真係早知唔讀好過。L博士話，有學生搵佢傾，因為777話日後讀博士由政府出錢，希望留港讀博士。L博士即刻勸佢，唔好咁睇唔開，唔好響香港讀，因為就算免費都好，讀完之後，學歷太高，出面私人公司一樣冇嘢撈；至於大學云云，響香港之大學讀博士，自己人都鍾意國際化，寧願請西人，都唔請土產博士，唔好響香港浪費青春，早啲出國啦。原來L博士，下個月開始，響港島同新界一齊開班，即係一、三響港島，二、四響新界，做流浪老師也。
我係想講，香港在劇變之中。網購衝擊緊零售，商店已悄悄關門。業主狂加租，中小企叫苦連天。高級人才讀完書同地盤工一樣，勞動光榮撈散度日。我唔係話政府要出手幫佢地，而係冇多元經濟，香港好多青年同唔少行業，真係冇乜出路。