脫鈎

寫稿時，美帝副國務卿大佬克將會到寶島訪問。大佬克去寶島做乜呢？寶島名嘴話，佢到訪係要延續，上次English Choi政府主催嘅，各國另組生產鏈等事情。咁當然係唔止呢啲嘢嘅。事關今年五月，侵侵提到要同北方大國「脫鈎」之後，依家係一個脫鈎部署過程嘅一部分矣。

脫鈎係大方向。依家方向已定，就係籌組同埋入局嘅過程。例如，侵侵早前話，要退出世衛，唔少人笑佢傻瓜，早排美衛生部長去寶島，講嘅相信就係呢啲嘢。咁例如早前侵侵講過，佢要另組一個新嘅國際經濟組織，好多人話佢傻咗。但係望返轉頭，侵侵唔係傻人，佢真係認真地做。好啦，假設你係一個小國嘅領袖，依家美帝俾個消息，同你講佢地搞一個新嘅國際經濟組織，想你加入，仲同你講，唔加入就當你係敵人，咁你又有乜嘢高招，可以同美帝說不呢？依家係，美帝四處拉盟友加入佢所籌組嘅新經濟秩序，你一係yes，一係就俾人踢出「侵侵經濟圈」，咁似乎係無得選擇係咪？你如果say no，仲聲大大鬧美帝，後果就係取消你嘅特殊地位，取消特別待遇，俾人踢出呢個新局，咁又可以點呢？

所以，英帝外相文哥去美帝傾乜嘢？梗係唔係香江事情啦。香江響佢地美英雙帝眼中，已經唔係「侵侵經濟圈」的一部分，早就響侵侵嘅香港關係正常化之行政命令中，判了死刑，踢咗出去。其實英帝做乜呢？因為美英雙帝一早傾好，當英帝離開歐盟之後，美英雙帝就準備簽一個新嘅自由貿易協議。換句話說，英帝率先加入呢個「侵侵經濟圈」。兩國加入之後，跟手就係五隻眼啦，然後就係五隻眼嘅親密戰友啦，戰友嘅朋友啦，然後就趁一個機會同場合，宣布呢個新組織同概念。呢排美帝國務卿肥蓬頻頻去歐洲，特別去東歐北歐，仲去出席Asean 組織開會，真係講玩咩？佢密密搞侵侵經濟圈，唔使同你交代。

英帝外相文哥今次訪美，任重道遠。首相波叔自從肺炎病好之後，痛定思痛，不再含糊，唔再理內閣意見，執意行走更反歐嘅路線，以及更親美嘅路線。外面鬧佢，點解唔走平衡路線，既同侵侵friend，又響北方大國合作，兩邊搵錢，不知幾好。但係，呢個想法一廂情願。問題係，波叔唔加入「侵侵經濟圈」呢，侵侵都唔會好理，一樣自己去做。但如果英帝加入呢，可能有更多著數。今年年頭開始，英帝要唔要join 美帝，已到臨界點，因為既然已脫歐，英帝唔靠美帝，可以靠邊個呢？

英帝走去親美，歐盟就有被拉去美帝方向嘅壓力。肥蓬就見縫插針，訪問捷克、北歐等國家，大大力去撬鬆歐洲國家對美帝嘅立場。脫鈎同「侵侵經濟圈」係一個銀幣嘅兩面，依家好難制止個momentum矣。 

倫敦大學亞非研究學院法律系博士