每個國家，都想趁美帝同北方大國開火之時，食兩家茶禮。正所謂家家有求。美帝四圍巡，每次佢地去一個國家，就叫人唔准用威威科技5G產品。但係，好多國家都仲係表面富貴，裡面冇水。美帝叫你唔准用威威，但係又冇畀錢你去解決財困，咁好明顯，北方大國又想打破美帝封鎖，樂意買嘢，咁意大利又梗係簽一帶一路，日本人自然又邀請北方大國主席訪日啦。
英國政府早前向國會提交香港半年報告書。(資料圖片)
有時唔好怪某啲國家要食兩家茶禮。英帝繼美帝之後，對港之半年報告又轉守為攻，開些少火啦，好似聊勝於無，求求其其。好多人以為，美帝借《香港政策法》為名，干預香港事務，都只係個別國家之劣行，加埋侵侵都係一個lone wolf，獨來獨往，點會理班盟友係未跟機。但係，今次有啲唔同。上星期美帝政策法報告講香港自治程度受損，用咗一啲例子例如DQ參選人同埋民族黨港獨之類，轉頭本周英帝之半年報告又係講呢啲。英美雙帝唔通有心靈感應，隔咗條金鐘香港公園，都可以連埋正義道同花園道之思維模式？又或者真係純粹巧合？
英國佬係未真係完全撐美帝？咁都要睇下利益。依家佢地脫歐搞到一鑊泡，又驚經濟會一沉不起，咁英帝點樣都係食四方飯之國家，冇可能一味只跟美帝而唔去搵一帶一路。有睇開本欄都知，晨咁早都叫大家注意，May姐唔係無能，而係人地逼宮逼到佢冇辦法做嘢，因為佢地黨內正在廝殺之中。呢幾日傳得最多嘅，就係只要May姐劈炮，議員們就會支持May姐提出之脫歐方案。咁咪係囉，有一班友，真係可以置國家利益於不顧，利用呢件事去夾瓜May姐之政權。咁可能May姐下台，重新同歐盟傾刁，先至係最合符國家利益都未定。
所以，唔好以為美帝出份政策法報告之後，一切如常。香江享有美帝特殊地位，唔係任何人賜予，英帝固然唔會，北方大國亦冇咁嘅牙力，而係香江自己上上下下用勤奮努力取得國際社會之信任而攞番嚟。依家好打得好似當冇嘢咁，求求其其得罪美帝以為冇後果，真係後果係咁樣？你話呢？
睇台灣新聞，你真係以為Korean Fish做到總統。當然唔係啦，過往幾屆都會睇到，一到兩黨初選之時，就會有深藍同深綠先站出來搞局。今年一邊係Korean Fish，深藍到黑咁滯，當然會引來大批深藍支持者同情啦，情況就似上屆之柱姐一樣。上屆柱姐贏埋初選，幾乎半隻腳去選埋，最後畀朱立倫拔走，係未？另一邊深綠之賴神，又係出來搞局，同走中立溫和路線之English Choi 爭下。上屆總統選舉經驗，深藍深綠出擊初選唔係去搶眼球，而係爭奪黨內利益，但最終都係因為勝算問題而退選。老實，如果台灣總統選舉係深藍vs深綠，都幾有睇頭，哈哈！
