斯德哥爾摩地鐵車廂裡面有人行乞早已司空見慣。各式各樣嘅行乞者都有；癮君子、集團式行乞者，或者有酗酒問題嘅人。早兩日坐地鐵我遇到嘅一名後生女卻令我印象非常深刻。
呢名後生女目測廿六、七歲，揹住個大背囊。每行到一卡車就停低講一小段說話，向各位善長交代自己點解會去到呢步。同其他行乞者唔同，佢衣衫感覺乾淨企理，冇難聞酒味，而且口齒非常清晰，唔係有不良嗜好。我心諗佢呢個年紀理應係大部分人最瀟灑任性，可以去追逐夢想嘅階段。到底呢個女仔經歷咗啲咩，點解佢會行到去呢一步，放下尊嚴喺眾人面前行乞呢？雖然我瑞典文太差聽唔明佢講咩，但我心諗我一定要幫佢！
我正有衝動想喺袋摷錢俾佢，卻醒起自己只得幾蚊現金喺身。都係唔好喇，俾幾蚊人好似好侮辱咁。我又諗，其實呢個後生女最需要嘅唔係幫得一時唔幫得一世嘅十元八塊，而係一份工。所以我開始幻想自己帶佢去剪頭髮、買套斯文衫畀佢，然後帶佢搵份工會比較實際……十幾秒間，列車已到站，佢嘅身影亦早已消失於人群中。無論幻想世界再美好，現實裡我少少都幫佢唔到。人生都一樣，我哋一方面想將事情做到最好，另一方面內心充滿疑慮。我哋總係猶疑不決，想著想著然後機會就走了。下次若再遇到呢名後生女，我會毫不猶疑上前伸出援手。因為能夠給予嘅哪怕再少，都總比空想好。
一名乾物女，過氣空姐，為愛由北區移居到北歐多年。熱愛地球同時喜歡講粗口，志願是能夠與動物溝通。