平日行大型商場，展覽唔係車展就係食品展，就算藝術展都多係攝影展。不過今日開始至1月21日，時代廣場露天廣場有個瓷器展，通常呢啲題材只於博物館或者藝術館出現，今次向香港本土手繪磁器業致敬，配合香港僅存的傳統手繪磁器廠90周年紀念，非常有意思。咪住先，一陣「瓷」，一陣又「磁」，邊個先至啱？原來「磁」係清朝至民國通用字，與「瓷」同義，現今日本仍沿用。

講番個展覽，粵東磁廠於1928年在九龍城設廠，一直保育承傳廣彩手藝，Ray昨日聽磁廠第三代傳人曹志雄老闆介紹，廣彩的正確名稱是廣州彩瓷，自康熙流傳至今已經有三百年歷史，當年廣州設立十三行商館區，瓷器是最受歐美商人歡迎的商品之一，聰明的商人從景德鎮運白瓷胎來廣州，又聘請當地師傅到廣州教本地人畫彩瓷，按外國客人的圖案要求加工繪瓷，再烘燒，加速交貨期，令廣州出產的彩瓷成為外銷瓷的一脈。廣彩傳到香港後，混合中西共融彩瓷圖案，演變成為另有特色的「港彩」，值得香港人珍惜保育，例如「督花」圖案，就係1975年港督麥理浩夫人以一隻破爛的古董青花瓷器，按圖案訂造的餐具圖案，原來是百年前英國的圖案，以前是藍色的，近年同一圖案採用鐵紅色，特別受日本人歡迎。

Ray於預展中睇過部分展品，果然珍貴，好似睇緊香港歷史，而譚師傅同徒弟Dixon更即席示範手繪基本功，例如車線要夠手定，令Ray大開眼界。今次展期中幾個周六日，幾位繪瓷最少40至50年的大師傅，都有安排即場示範傳統的人手繪瓷，大家唔好錯過。