Maison Margiela進軍豪宅市場。
你無睇錯，就係嗰個1988年由Martin Margiela創立、神枱級嘅時裝品牌——Maison Margiela。雖然祖師爺Margiela本人早就退下火線，但佢開山劈石打出嚟嘅前衛王國依然屹立不倒。而家，隸屬OTB集團嘅Maison Margiela唔止玩衫玩鞋，仲要玩埋樓！聯手Alta Real Estate Development推出Maison Margiela住宅項目，正式進軍奢華住宅界，選址落腳杜拜，講真，一啲都唔意外——潮人集中地+炫富天堂，perfect match。
呢個住宅計劃坐落喺杜拜地標級地段——朱美拉棕櫚島(Palm Jumeirah)，全盤只得25間尊享住宅，限量到爆。整個建築注入Maison Margiela嘅靈魂元素：解構、錯視、轉變。設計由Maison Margiela同意大利建築師Carlo Colombo一齊操刀，玩盡材質實驗，將建築同藝術完美融合。室內仲配有專屬訂製傢俬，令空間設計同建築語言互相對話——一如Margiela一貫嘅哲學：細節先係靈魂。
自1988年成立以來，Maison Margiela一直係打破時尚框架嘅代名詞。其實由開頭開始，Margiela就唔止當時裝係時裝——佢早就將「室內設計」納入品牌 DNA。最初嘅工作室全白極簡，用日常用品砌出藝術感，嗰種簡單粗獷直面直接，是我心目中元祖級品牌最初的原貌。
後來，品牌參展米蘭國際家具展(Salone del Mobile)，仲同Cerruti Baleri合作，創作出經典作品，例如扶手椅、瓶燈、白色靠墊等。Margiela嘅世界觀更延伸到巴黎香榭麗舍大道上嘅La Maison Champs-Élysées酒店，入面每個角落都係佢標誌性嘅藝術語言。
今次嘅杜拜住宅，話就話延續咗呢份品牌精神——紋理、材質、層次感無處不在，融合石灰華、白色樹脂同Margiela最愛嘅「Décortiqué」工藝，但就不再是最初的模樣，我這種古老石山就是看不慣。不過入住得的住戶應該會好享受，除了裝潢極簡奢華，還有專享藝廊、圖書館、健身室、無邊際泳池、水療中心、Maison Margiela Café等等設施——時尚生活literally一條龍。
呢個項目亦係Margiela在中東擴張戰略嘅重頭戲，同步迎來品牌精品店同咖啡館喺阿聯酋購物中心開幕。Maison Margiela住宅計劃正式開啟品牌新篇章。日後會唔會衝出杜拜？拭目以待。