曾經的英國高街巨頭Topshop強勢回歸，上周六於倫敦地標特拉法加廣場(Trafalgar Square)搞咗場盛大嘅戶外時裝騷，加埋after party，正式帶嚟2025秋冬系列。同時宣布官網Topshop.com重新上線(不再依附於ASOS)，Topshop同Topman今次係誓要捲土重來。
不過，呢位昔日高街霸主，單靠一場大騷，真係可以重新站穩陣腳？
Topshop自從2020年母公司Arcadia集團執笠，給ASOS用2.95億英鎊收購之後，一直都冇實體舖，品牌定位亦有啲迷失。但今次喺Trafalgar Square大搞公開活動，就好明顯係想轉方向，唔再淨係靠網購，而係重新連結返本地文化同街頭氣氛。特拉法加廣場一直都係抗議、慶祝、示威嘅場地，今次變成時裝騷現場，氣氛一流，也有一種緊貼時代脈搏的感覺。
Topshop今次出嘅2025秋冬系列，有濃濃復古味，用「即睇即買」模式登場——意思係睇完時裝騷，啱心水即刻可以上網買。唔少香港人都會記得以前到倫敦，一定會去Oxford Street旗艦店朝聖嘅日子，尤其當年Topshop招牌的牛仔褲，今次佢哋就想搵返呢班忠粉。Topshop話今季女裝以剪裁利落嘅外套、搶眼連身裙同埋佢哋經典牛仔系列，尤其係Joni同Jamie牛仔褲——依家有新剪裁，希望再一次引領潮流。男裝Topman就主打「現代實用風」，設計上夠sharp、有型，西裝、靛藍牛仔布都有齊，夠晒貼地又夠潮。
今次時裝騷唔淨係賣衫咁簡單，重點係用倫敦文化打氣氛牌，搵嚟Notting Hill Carnival音響系統Good Times打碟(由Norman Jay MBE同Melvo Baptiste坐鎮)，Charlotte Tilbury團隊化妝、MOTH搞cocktail party。一個show就集合晒時裝、文化、派對同科技，變成好盛大一件事咁。
Topshop官網依家已經重新開放，但暫時只限英國地區，有齊Topshop同Topman全線產品，仲有由品牌大使Cara Delevingne親自揀出嘅34款推介款式。
回顧下品牌在香港的足跡，Topshop當年喺2012年同連卡佛合作進軍香港，開咗中環旗艦店，之後2014年加碼喺金鐘同銅鑼灣開分店。不過銷情麻麻，最終3間舖都先後執笠，2020年正式撤出香港。