先跟大家講個故仔。
大概半年多前，朋友喺尖東某間荼餐廳食飯，叫一隻雞竟然要兩百幾銀，一碟菜要八十幾蚊，再加兩個白飯同兩杯嘢飲，埋單三舊半。睇見呢個價錢，你簡直好唔忿氣，菜唔多好味不特止，衛生環境差勁，食飯時要搭枱，同啲大陸佬你眼望我眼，食完又要匆匆埋單，但花費唔平得過稻香，你話幾氣頂。
點解會咁貴，好自然會諗到係咪因為啲大陸人食貴晒？連啲過去係基層嘅消費，都可以收個幾高昂費用。
自由行推出後，冇錯香港確實繁榮咗，市面熱閙咗，消費勁升咗，但再諗諗，自由行對零售、飲食同地產有好處，佢哋嗰行人工高咗、老闆賺多咗，相關嘅上市公司股價大升咗。然而其它行業有乜受益，似乎又唔多覺，當然市道旺對整體經濟有裨益，但硬係覺得自己冇直接受惠。
而且，香港啲消費就一日貴過一日，出街又俾啲大陸大叔或者大媽部手拖車車落對腳；想逛吓街，周街都係金舖藥房同化粧店，根本冇晒選擇，而且啲Sales同食肆服務員因為生意易做，態度勁差，作為香港人，真係幾火滾兼無奈
所以你話我哋對內地同胞點解或多或少都有啲仇視。
於是，當睇見個舖市回落，香港唔少人都有啲幸災樂禍心態，雖然知道唔應該，但人就係人，有時就係感性蓋過理性。
不過咁大家又唔使咁悲觀，自由行減少已經係不爭的事實，十一黃金周大陸客消費據報較去年要差，近期報章也大事報道旺區商戶難頂貴租，先後結業，有啲媒體仲話，未來舖租將會勁跌，總之講到好似舖市末日。
媒體素來都係誇張，市旺唱好到你唔信，市差時又講到大限將之，仲話衰過沙士。對於媒體評論，大家無需太認真，Loser相信租金有機會下調一兩成，個別地區甚至要更多，但斷唔會話大插水，只係以前租金過高，喺市道回軟下回歸理性，畢竟依家點差都未到沙士時人人擔心會死，邊仲有心機去消費，況且當年都未有自由行。