「沙特」之星在東北

26歲嘅狼隊隊長魯賓尼維斯以高10倍人工，跳槽沙特聯賽呢個銷金窩，利字當頭，震撼力唔小；不過油國要實現7年大夢，包括爭辦2030世盃決賽周，即落柯打泵脹沙特聯賽4大強隊，但只見球王C朗上季喺當地陷入「無冠」窘局，用明星效應，還要放長雙眼。

近期呼風喚雨嘅沙特公共投資基金(PIF)現時嘅操作，唔止幫到車路士甩走隊內一啲老傷兵；狼隊上季為護級超支，包括重金買咗兩位比尼維斯更當打嘅葡國國腳，今次油元挖走佢哋隊長，係雙贏格。其實呢個基金兩三年前排除萬難、慧眼購入一向死忠粉絲多嘅紐卡素，矢要成為「曼城翻版」，越玩越靚。將會再戰歐聯嘅紐記，近日以破該會紀錄轉會費購得意甲超新星辛度東拿利，對意甲嘅震撼力同傷害唔細。擅打防中同交助攻嘅23歲東拿利，係阿仙奴佐真奴嘅意軍接班人；近期幫拖落U21隊爭歐國盃，咁啱同「幼獅」嘅攻擊好手、未來球會隊友安東尼哥頓一時瑜亮，令紐迷興奮非常。PIF用緊對佢哋嚟講只係濕濕碎嘅budget，只要避得過講多過做嘅歐洲足協財政公平條例(FFP)，足以令呢隻「喜鵲」喺英超拍翼高飛。