兵工廠還欠甚麼

英超球隊經歷瘋狂快車期洗禮後，只見「兵工廠」阿仙奴成功抵禦傷兵潮未有冧檔，不過外界仍然對佢哋可唔可以一圓22年嘅英超冠軍夢充滿疑惑。阿迪達帶隊剛踏進第7年，按部就班將各項事情推向極致，營造似一家人氣氛和諧冇壞孩子後，唔少主力更喺呢幾年成家立室多為人父，一班成熟男孩再度衝冠。兵工廠有幸遇上唔少Big Six對手戰力走低換主帥，自己變身Corner FC後又成為Own goal FC，踢得唔好一樣有辦法贏波。教練團有死球、防守專家，又剛有著名掟界外球教練加盟，盡收天下兵器；但只見大敵曼城添前鋒決心挑機，更喺英足盃一場入10球外露霸氣，正係兵工廠長期無冠下，眾將欠缺嘅氣焰同膽量，佢哋爭4冠定再度食白果，已進入關鍵時刻。

達Sir話剛戰中三元嘅馬天尼利賽後翌日都會跑大約16公里練習，呢位巴西人只嫌速度有時快過腦筋轉數，陣上門前失機唔少，兵貴神速唔係單講鬥快，正係兵工廠進攻弱點。藍月哥帥最叻將球員狀態同心理質素推上高峰，英超係咪改朝換代，睇嚟仲有排鬥。