英超不努力
呢個年頭要入選三獅國腳，標準定得好高，同樣24歲當打嘅倫敦大球會藍血人高爾彭馬同馬度基，一再俾國家隊領隊杜曹嫌棄。其中阿仙奴翼鋒馬度基，冇自我放棄，據阿仙奴領隊達Sir透露，佢呢期咁勁因為趁上個國際賽期有兩、三個禮拜空檔，去咗葡萄牙揾教練同佢作短期特訓，返到嚟咁啱阿仙奴右翼首選沙卡仔傷咗，造就咗機會留俾有準備嘅人。馬度基喺邊路fit爆狂扭波過人，成為兵工廠贏波嘅奇兵，咁勵志嘅新聞好少有，馬度基識諗知道自己再唔努力，好快就會墮入英格蘭翼鋒早熟早殘嘅宿命，今個假期唔知佢會唔會又去特訓，改善下埋門一腳？
不過10號位嘅高爾彭馬，3年前加盟車路士即踢到曉飛，更當選該年度英格蘭國家足球先生，但之後每況愈下，入球不斷減產；今夏世盃開始已無份入選三獅，佢同火辣女友嘅場外新聞更受外界關注。事實佢喺上輪國際賽後踢咗車仔5場入1球1紅牌，呢期放假唔知有乜搞作令自己重振雄風，拯救落後緊榜首阿仙奴11分嘅車路士呢？
