紅魔換帥一定得
紅魔喺後費格遜年代長期混亂,呢十幾年正式換到第8個領隊,高手衰極都有個譜,級數極高嘅摩連奴更攞過兩個盃先走人。今次新帥普捷天奴起步點低得多,紅魔英超排緊尾三,歐聯大聯賽排中游,有利營造低位反彈。
只係中途接手紅魔從來唔易,之前嘅蘇斯克查、艾摩廉同剛被炒嘅卡域克,前兩人最叻只攞過歐霸亞軍,卡域克只係年初攞過英超每月最佳領隊。普捷天奴有400場執教英超嘅經驗,佢香港時間周三早上最後一次帶埋美國隊比賽,跟住帶埋做體能教練個仔上機,成隊人橫越大西洋空降嚴寒嘅曼市救亡,大約有兩三天時間,領紅魔英超作客硬撼利物浦,頭炮超難踢。
據聞普帥上場將會勁谷懶於走動嘅紅魔兵體能,賽事翌日取消休假。季前練兵唔同季中,英超強隊頭尾計「一周三賽」係常態,呢種硬招只怕令傷兵營人數有增無減。1月先有得買人,遠水又難救近火,紅魔場外管治者無能,場內喺季初踢咗15場失30球,如果幫唔到防線止漏,只怕普帥回歸英超係長打護級戰。








